DILI, STLNEWS.co – Sosiedade Sivil rekomenda ba governu liu husi Ministeriu Kombatente Libertasaun Nasional halo esforsu, nunee bele buka tuir ona restu mortais sira neebe mak too oras nee seidauk hetan.
Haktuir eis Prezidente Rede Feto, Judite Dias Ximenes ba STL iha nia knaar fatin Kaikoli, Domingu (10/09/2203).
Nia katak, governu halo esforsu ona oinsa mak buka restu mortais sira neebe mak too oras nee daudaun seidauk hetan, nunee tau iha fatin neebe mak dignu.
Nia hatete, oras nee daudaun familia mos esforsu atu buka tuir nia familia sira nia ruin ka restu mortais, maibe governu mos esforsu oinsa mak buka tuir liu-liu sira neebe mak inimigu lori sai oho fatin seluk hanesan saudozu Mau-hudo, Nicolao Lobato no seluk tan.
“Restu mortais sira neebe mak iha rai laran nee familia sira mak buka rasik, ho vizaun no mehi ba buka fatin hotu, maibe sira neebe mak bapa lori sira nia isin ba sorin hanesan Saudozu Mauhudo, Hanesan Prezidente Nicolao Lobato, Daitula no sira seluk tan, neebe mak bapa lori sira nia isin ba sorin neeba nee, ou sira neebe mak mate ita la hatene tuir, no ida neebe mak mate ita hatene tuir mak hau dehan nee, ezemplu iha rai laran estadu tenki fo omenajen hanesan Saudozu Anacleto Almeida, uluk familia hakoi iha los bee dalan, ikus bee lori nia isin tomak, ruin rohan ida mos la hetan, tanba nee husu estadu haree didiak ita nia ema sira nee,” dehan nia.
Iha sorin seluk, Diretor Ezekutivu Forum Organizasaun Naun Governamental Timor Leste (FONGTIL), Valentim da Costa Pinto hatutan, Ministeriu Libertasaun Nasional ho sekretariu Estadu Presiza buka tuir.
“Ami rekomenda ba ita nia Ministeriu Kombatentes Libertasaun Nasional no Sekretariu Estadu neebe mak tutela atu haree ba ida nee bele servisu hamutuk ho ministeriu solidaridade sosial no inkluzaun ho administrador hotu iha munisipiu para bele rekolha ona restu mortais hodi tau iha fatin, nunee bele ajuda ita nia governu hodi tau iha fatin sira neebe mak dignu hanesan ita nia erois, para jerasaun sira tuir mai fali hanai nafatin, ita tenki banati tuir sira nia sakrifisiu neebe mak sira sira luta hodi ita dezenvolve ita nia rai ho diak,” dehan nia.
Tenki opta ona rekomendasaun sira neebe mak mai husi CAVR no parte seluk tan tenki hatuur ona iha kurikulu sira, hodi nunee jerasaun sira tuir mai fali kontinua haree no hatene istoria Timor Leste nee ho didiak.
(eme)
