Governu Presiza Halo Investimentu Ba Joven Sira

DILI, STLNEWS.co – Konselhu Nasional Juventude Timor Leste (CNJTL) husu governu atu halo investimentu ba joven sira iha Timor Leste.

Lia hirak nee hatoo husi Sekretariu Ezekutivu CNJTL, Mateus Lemos Soares ba STL iha MJDAC, Lesidere, Dili, Segunda (07/08/2023).

Nia dehan, prioridade barak neebe governu halo ona, ida nee mak produz ona politika nasional juventude, produz ona planu asaun nasional ba dezenvolvementu juventude. Halo parseria barak ho nasaun vizinhu sira ba kooperasaun, hodi fo oportunidade ba joven sira atu asesu ba kampu trabalhu.

“Ami hanoin katak, hirak nee deit la too, presiza halo investimentu ba joven sira, liu-liu iha rai laran, iha seitor produtivu sira neebe presiza joven sira nia partisipasaun,” nia tenik.

Nia dehan, dezenvolve setor turizmu neebe presiza joven sira nia partisipasaun, neebe hanoin katak politika nasional juventude iha ona, planu asaun nasional no abordajen integradu iha ona, presiza deit governu nia investimentu.

Nia hatete, hanoin katak ho governasaun foun nee bele iha seriedade ba investimentu iha programa krusial sira, para bele ajuda liu tan joven sira bele ultrapasa ka rezolve problema dezempregu, kiak no mal nutrisaun iha Timor Leste.

Nia dehan, problema mal nutrisaun nee afeita ba joven foin sae sira neebe kaben sedu, sira ladun iha konhesimentu diak hodi tau matan ba oan sira.

(mar)

LEAVE A REPLY

Please enter your comment!
Please enter your name here