DILI, STLNEWS.co – Governu presiza kria laboratoriu ba AIFAESA.IP, nunee asegura hahan importasaun neebe tama mai Timor Leste molok distribui ba merkadu.
Lia hirak nee hatoo husi Diretor ezekutivu Forum Organizasaun Naun-Governamental Timor-Leste (FONGTIL), Valentim da Costa Pinto ba jornalista iha Farol kuarta (18/07/2023) hatete, husu govenu kria laboraroriu nunee bele asegura hahan importasaun
Diretor dehan, tempu barak sira rekomenda ona katak AIFAESA nee estabelese hanesan instituisaun ida neebe ke halo knaar, hodi asegura konaba hahan sira neebe importa mai husi rai liur neebe sidadaun sira konsumu.
“Ami nia hanoin AIFAESA nee hanesan instituisaun ida, hanoin governu tenki kompleta ona nia rekejitus servisu sira, bele estabelese laboratoriu ida neebe ke diak no kompleta rekursu humanus neebe bele servisu iha AIFAESA.IP,” dehan Diretor FONGTIL.
Diretor rekomenda sasan neebe mai husi rai liur too iha portu tenki halo uluk sertifikasaun molok distribui ba merkadu no super merkadu sira iha teritoriu nasional. Lakohi sasan sira neebe mai husi rai liur too iha portu nee mai kedas iha merkadu, mai kedas loja.
“ita hanoin iha laboratoriu para ita komesa tama ona oinsa mak ita halo sertifikasaun ba ai haan sira neebe mai, serake aihaan sira mai nee saudavel no seguru ba ita ka lae, para ita bele proteje didiak konsumidor sira liu-liu populasaun sira neebe laiha kbiit konhese sasan sira ho diak nee para ita bele evita, se lae ita konsumu ai haan diak no ladiak, tanba ita laiha sertifikasaun no laiha kontrolu ida molok sasan nee ba merkadu,” katak nia.
Nunee mos sasan hotu neebe mak mai husi rai liur AIFAESA.IP mak iha kompetensia tenki halo sertifikasaun molok faan nain sira nee lori sasan ba merkadu para ema hola, tanba ema hanesan konsumidor hahan neebe ema sosa nee tenki diak ba ema nia saúde, labele fo afetasaun ba ema nia saude.
Tanba nee, rekomenda tebes, persiza iha laboratoriu kualidade ba AIFAESA para nia halo knaar no fo tarifa servisu tenki permiti fo sertifikasaun ba ai haan sira neebe mai para ema bele haree nia expire too bainhira, nunee bele iha ona standar nasional.
Nunee mos tuir Akademista Lazaro Fernanades haktuir tan katak, se laiha laboratoriu atu detekta sasan liu-liu hahan husi rai liur mai Timor Leste bele fo impaktu ba saude povu.
“Ita haree ayam potong, sosis sira nee husi rai liur mak mai, lo-loos iha laboratoriu hodi bele halo teste, se lae lori moras ba povu,” katak nia.
Nia mos rekomenda ba povu tomak diak liu evita han hahan importasaun, diak liu han hahan lokal Timor nia, tanba oras nee daudaun laboratoriu teste ba hahan laiha, ida nee susar.
Antes nee Ministru Komersiu Industria (MCI), Filipus Nino Pereira mos rekonhese falta laboratoriu hodi prejudika servisu AIFAESA.IP nian, tanba labele halo teste urjente ba hahan importasaun sira neebe diskonfia laiha kualidade, tanba nee governu sei esforsu hodi servisu hamutuk ho parte kompetente hodi bele rezolve problema laboratoriu.
(eme)
