DILI, STLNEWS.co – Governu presiza tau atensaun ba povu neebe mak sai vitima ba iha dezestre naturais foin lalasi nee, tanba sasan barak inklui uma komunidade hetan estragus.
Lia hirak nee hatoo husi Konselhu Fundador RONETIL, Laurentino Alves ba STL iha nia knaar fatin Farol, kuarta 12/07/2023.
Nia hatete, udan no anin neebe foin lalais akontese iha loron 1-5 fulan Julhu estraga estrada barak kotu, no uma komunidade barak mak hetan estagus, tanba nee husu governu tau atensaun.
“Foin lalais semana primeiru fulan Julhu nee akontese dezastre klimatika neebe estragus ba estrada publiku, no destroi ka estragu ba komunidade sira nia uma, iha parte costa sul no rai klaran nee hanesan situasaun ida neebe ita hotu la espera, nunee governu foun tenki fo atensaun hodi rezolve,” katak nia.
Governu presiza fo atensaun masimu hodi tau prioridade ba prevensaun mudansa Klimatika, tanba nee fo ameasa ba komunidade sira nia vida.
“Konaba situasaun dezastre Klimatika neebe akontese nee governu tenki tau atensaun, hodi oferese apoiu urjensia ruma relasiona ho nesesidade komunidade afeitadu sira nian, tanba nee bele konsidera hanesan kalamidade publiku neebe hafraku siklus povu maubere sira nia moris loron-loron,” katak nia.
Nunee mos haree ba situasaun klimatika nee, RONETIL nia mensajen ba Ministeriu Obras Publiku (MOP) tenki halo ona servisu integradu ho ministeriu relevante sira, tenki halo levantamentu dadus, estudu viabilidade no analiza risku jestaun ba dezastre klimatika mak akontese, nunee bele minimiza frekuente dezastre nee ba iha area risku sira iha teritoriu Timor-Leste.
Nunee mos Diretor Ezekutivu Fundasaun Mahein, Abel Amaral husu komunidade sira iha Timor Leste laran tomak atu hadook aan husi fatin neebe mak risku ba dezastre natuirais.
“Husu komunidade sira atu hadook aan iha fatin neebe mak risku ameasa ba vida, tanba buat ida udan boot ho dezastre nee la fihir se mak se, tanba nee mak atu evita sai vitima ba iha dezastre naturais iha tempu udan, primeiru povu sira tenki iha konsiensia labele konstrui uma iha fatin neebe risku hanesan rai lolon, foho lolon, nomos fatin neebe mak besik tasi nee risku ba vida ema nia,” dehan nia.
Nia mos husu governu tau atensaun ba komunidade sira neebe mak afeita ba vitima dezastre naturais nee.
(eme)
