Governu Sei Konstrui Sentru Formasaun Exelente Iha 2022

DILI, STLNEWS.co – Sekretariu Estadu Formasaun Profesional no Empregu (SEFOPE), Alarico do Rosario hateten, dadaun governu hahu ona prepara ekipa task force, hodi haree prosesu sira antes konstrui fatin Sentru Formasaun Exelente iha Metinaru tinan 2022 oin mai.

Kestaun nee nia haktuir ba jornalista, wainhira remata enkontru ho Primeiru Ministru Taur Matan Ruak, iha Palasiu Governu, Kinta (04/03/2021).

Alarico katak, nia hetan konvite husi Primeiru Ministru Taur Matan Ruak no Ministru Koordenador Asuntu Ekonomia (MCAE-sigla Portugés) para kolia konaba oinsa kria ekipa task force, hodi prepara antes konstrusaun fatin Sentru Formasaun Exelente iha Metinaru.

“Ami hetan konvite husi Primeiru Ministru Taur Matan Ruak ho Ministru Koordenador Asuntu Ekonomia (MCAE), mai atu kolia konaba oinsa kria ekipa task forse neebe forte hodi hare prosesu ka preparasaun kontrusaun ba Sentru Formasaun Exelente neebe tuir planu sei hari iha tinan oin iha Hera,” dehan membru governu nee.

Nia dehan, antes kria Sentru Formasaun Exelente nee, presiza kolia uluk ho lina minesteriais neebe iha relasaun ho planu kontrusaun ba Sentru Formasaun Exelente nee.

Orsamentu neebe VIII governu konstituisional preve ona ba konstrusaun obra Sentru Formasaun Exelente nee, antes preve ona iha orsamentu 2020 hamutuk tokon $15.

Sentru Formasaun nee sei akumula ema too 5.000 no sei harii iha rai ho medida ektare 27.

Reportajen: Alberto Menezes
Editor: Domingas Gomes

LEAVE A REPLY

Please enter your comment!
Please enter your name here