DILI, STLNEWS.co – Governu presiza tau atensaun ba lei salariu minimu, nunee fo benefisiu ba trabalhador sira.
Lia hirak nee hatoo husi Diretor Ezekutivu Asosiasaun Hak, Feliciano da Costa Aroujo ba jornalista STL iha nia knaar fatin Farol, Domingu nee (16/07/2023).
Nia hatete, IX Governu Konstitusional presiza tau atensaun lei salariu minimu, nunee bele reve fila-fali depois foti alternativu ida fo benefisiu ba trabalhador sira.
“Espetativa Asosiasaun HAK ba IX Governu nian atu bele mos tau atensaun liu-liu atu reve fila-fali, bele reve fila-fali depois foti nia alternativu ida neebe mak atu bele fo benefisiu ba funsionariu/trabalhador sira,” dehan Diretor ezekutivu.
Diretor HAK dehan, hanoin persiza atu reve fila-fali, serake salariu minimu neebe koloka ate agora nia relevante ka lae.
Nia hatutan, koalia honestu deit, tanba hanesan nee bainhira kuandu presu merkadu nee sae enatun sira mos tau ona hanoin oinsa mak vensimentu ba funsionariu nee mos tenki hasae, signifika sira apar ona ho situasaun ida nee.
Nia afirma, konaba salariu minimu governu tenki tau konsiderasaun, tanba realidade hatudu, serake antes eis sekretariu SEFOPE koloka hela US$ 115 mak hakarak atu mantein, ida nee tristi.
Tuir nia hanoin persiza tetu ida nee, ba IX Governu nian atu bele tau importansia, rekonhese vensimentu ida diak ba funsionariu no trabalhador sira, ba mak tinan ida nee la relevante ona ho salariu minimu ida US$ 115.
Nunee mos Akademista Lazaro Fernandes hatutan, tuir nia haree sasan iha merkadu folin sae makaas tebes, tanba nee governu presiza tau atensaun, se ho salariu 115 too 140 ida nee susar tebes.
“Ita haree sasan folin karun, foos uluk faan ba US$ 12,50 agora sae ba US$ 16,75 iha merkadu sira, oinsa ho salariu US$ 115 ka 140 bele sustenta familia, ida nee ba hau senti susar liu-liu sira neebe iha familia liu nain 7 ba leten,” katak nia.
Nia husu governu tau atensaun ba salariu minimu sira, nunee sira bele kontenti netik, se lae moris ho susar.
Antee nee VIII Governu Konstitusional liu husi Ministru Koordenador Asuntu Ekonomiku (MKAE), Joaquim Amaral promete atu aprova lei salariu minimu iha mandate, no ikus mai VIII Governu la konsege aprova tanba mandatu hotu.
(eme)
