DILI, STLNEWS.co – Governu tenki bandu Tum-Tum labele halo movimentu iha Kapital Dili, tanba kria engarrafamentu iha Sidade Dili.
“Ita nia governu tenki bandu ka labele autoriza Tum-Tum halao movimentu iha Kapital Dili, tanba Taxi, Mikrolet no Bis iha ona, sei aumenta tan Tum-Tum halai Dili laran, halo engarrafamentu deit” hatete Kondutor Mikrolet 0.10, Inacio da Costa Belo ba STL iha Tasi Tolu, Dili, Sabadu (29/07/2023).
Nia dehan, Tum-Tum bele halai iha munisipiu, labele halai iha sidade Dili, tanba Mikrolet no Taxi barak ona atu tula pasajeirus iha sidade Dili, nomos Bis ho Mikorlet barak mak husi munisipiu tula pasajeirus.
“Ita hakarak mikrolet ho taxi deit mak bele tula pasajeirus iha sidade Dili, atu nunee hamenus engarrafamentu iha sidade Dili, tanba sidade agora engarrafamentu iha fatin-fatin, halo ita lao mos labele,” nia esplika.
Iha fatin hanesan, pasajeirus Juliana Pereira deklara, governu labele autoriza Tum-Tum halai iha Dili laran, tanba sei aumenta macet no espasu estrada iha Dili nee klot, halo ema movimentu ba mai ladiak.
“MTK presiza moderniza transporte iha kapital Dili, laos tau fali Tum-Tum iha dili laran, se lae ita marka pasu iha fatin, tenki modernu no hateke ba nasaun avansadu,” nia esplika.
Observasaun STL iha Sidade Dili, oras nee daudaun Tum-Tum halao atividade movimentu iha area Tasi Tolu, sira tula pasajeirus Dili ba Liquisa no Liquisa mai Dili, ida nee halo engarrafamentu iha area Tasi Tolu sempre iha.
(jen)
