DILI, STLNEWS.co – Membru Parlamentu Nasional husu ba governu atu dezenvolve situs turizmu sira neebe hetan estragus, ho nunee bele atrai turista sira mai vizita.
“Hau hanoin governu tenki dezenvolve situs turizmu iha rai laran, tanba fatin barak hetan estragus hotu ona, maibe governu liu-liu Ministeriu Turizmu seidauk tau importansia atu dezenvolve didiak hanesan Kristu Rei, sasan barak mak hetan estragus, maibe governu la fo importansia atu hadia,” kestaun nee fo sai husi Deputadu Bankada KHUNTO, Antonio Verdial ba STL Kuarta nee (27/04/2022) iha Parlamentu Nasional.
Deputadu nee mos afirma, atu kontribui reseitas ba kofre estadu maka governu tenki iha politika neebe diak, hadia situs turizmu sira neebe hetan estragus ona, karik la hadia oinsa atu rekolha reseitas ruma husi baze.
Iha fatin hanesan, Deputadu Mariano Assanami hatutan, los duni governu tenki dezenvole fatin turizmu sira neebe lokaliza ona iha rai laran, tanba fati balu hetan estragus hotu ona.
“Orsamentu alokadu tiha ona, tanba nee husu governu atu dezenvolve situs turizmu iha rai laran, ho nunee bele atrai vizitante sira,” dehan Deputadu Bankada PD nee.
Hatan ba preokupasaun nee, Visi Ministra Turizmu Comersiu Industria (MTCI) Inacia Texeira hatutan, tanba situasaun Covid-19 neebe afeita iha rai laran, la fo biban governu atu dezenvolve situs turizmu sira iha rai laran.
“Hau hanoin governu iha ona fundus ida atu dezenvolve situs turizmu sira neebe aat, nunee ba futuru bele kontribui reseitas ba kofre estadu,” dehan nia.
(mad)
