DILI, STLNEWS.co – Reitor Universidade Nasional Timor Leste (UNTL), João Soares Martins hatete, governu presiza review fali sira nia planu atu halo sede ba arte marsiais.
Lia hirak nee hatoo husi Magnifiku Reitor UNTL, João Soares Martins ba jornalista sira hafoin remata sorumutu ho prezidente eleitu Dr. Jose Ramos Horta iha nia Gabinete Nobel ba Paz, Farol, Dili, Kuarta nee (11/5/2022).
“Governu iha ninia prioridade, mais hanesan Reitor UNTL neebe involve iha setor edukasaun, hau prefere governu presiza haree fila fali, review fali planu nee,” dehan nia.
Nia haktuir, osan neebe governu disidi hodi preve iha orsamentu retifikativu atu halo sede ba arte marsiais, diak liu investe ba iha setor edukasaun.
Membru arte marsiais sira normalmente fo kontribuisaun ba sira nia organizasaun, tuir lo-loos osan neebe sira kontribui ba organizasaun nee mak uza hodi halo sira nia sede.
(cri)
