Governu Xina Apoia Ekipamentu Lampada 200 Ba MI

Governu Xina liu husi nia Embaixada iha Timor Leste fo apoiu ekipamentu lampada 200 ba Ministeriu Interior, hodi asegura seguransa iha fronteira. (Foto: STL/Donaciano Magalhães)

DILI, STLNEWS.co – Governu Xina liu husi nia Embaixada iha Timor Leste fo apoiu ekipamentu lampada 200 ba Ministeriu Interior, hodi asegura seguransa iha fronteira.

Liu husi intrevista Vice Ministru Interior (V-MI), Antonio Armindo ba jornalista hateten, loron ohin parte Embaixada Xina iha Timor Leste konvida Ministeriu Interior, hodi bele simu apoiu ekipamentu hanesan lampada atu apoia seguransa iha fronteira.

“Ita boot sira hatene katak durante nee ita iha limitasaun iha fronteira, no husi Parlamentu Nasional (PN) mos preokupa ho limitasaun hirak nee, aleinde governu tau osan hodi kompleta limitasaun sira nee, iha parte seluk governu mos halo lobi ho doadores sira, ba buat sira neebe maka sira bele ajuda ita.” hateten Vice MI.

Nia hatutan, antes nee (horiseik), Embaixador Xina iha Timor Leste, Xiao Jianguo halo ona enkontru ho nia iha Gabinete MI nian, no haree ba debate iha Parlamentu konaba falta de ekipamentus iha fronteira nian. Tanba nee Xina mos prontu atu ajuda governu Timor Leste.

Foto: STL/Donaciano Magalhães

“Maske horiseik sira la promete atu fo, maibe ohin dadersan sira dehan ami iha ona atu fo ba ita boot sira, fo ba iha governu Timor Leste, atraves ba Ministeriu Interior para bele haruka ba polisia sira iha fronteira hodi uza.” hateten nia iha Embaixada Xina iha TL, Kinta (28/01/2021).

Vice MI Antonio Armindo informa katak, apoiu neebe maka Embaixador Xina fo hamutuk lampada 200, no sei fahe ba iha forsa sira neebe mak destaka iha fronteira, hanesan Unidade Polisia Fronteira (UPF), no forsa sira seluk neebe mak destaka iha fronteira,
liu-liu iha Mota Ain too Suai, inklui Oecusse, no ekipamentu hirak nee sei fahe ba sira, tuir mai mak governu mos halo ona prosesu hodi bele sosa tan atu kompleta.

Iha biban nee Vice MI hateten, apoiu neebe mak husi governu Xina, liu husi sira nia embaixada iha Timor Leste, laos foin mak lampada nee, maibe antes nee embaixada Xina fo apoiu ona hanesan botas no mos kapa udan nian hamutuk 4.000 resin.

Iha fatin hanesan, Embaixador Xina iha Timor Leste, Xiao Jianguo, afirma katak Xina sei hamriik nafatin hodi bele apoia governu Timor Leste, espesialmente sei apoia Ministeriu Saude no mos ba departamentu sira neebe mak relevante.

Reportajen: Claudios de Jesus
Editor: Ekipa STL

LEAVE A REPLY

Please enter your comment!
Please enter your name here