GSKKKO Rejista Prosesu Foun 710 no Konsega Finaliza Prosesu 474

Prokurador Jeral Republika (PJR) Jose da Costa Ximenes. (Foto: STL/Emerenciana Pinto)

DILI, STLNEWS.co – Hahu iha loron 15 fulan Setembru atividade Ministeriu Publiku (MP) komesa normal depois ferias judisial, durante fulan rua iha nivel nasional Gabinete Sentral Kombate Korrupsaun Kriminalidade Organizada (GSKKKO) rejista prosesu foun 710 no majestradu sira konsege finaliza prosesu pelumenus 474.

Kestaun nee hatoo husi Prokurador Jeral Republika (PJR) Jose da Costa Ximenes ba jornalista sira hafoin remata ho Prezidente Republika Francisco Guterres Lú Olo iha Palasiu Prezidente Bairru Pite, Segunda (19/10/2020).

“Enkontru ho Prezidente Republika informa ba ita boot sira katak hahu 15 Setembru, atividade Ministeriu Publiku komesa normal too ohin loron, depois ferias judisial, durante fulan rua ita iha nivel nasional inklui Gabinete Sentrál Kombate Korrupsaun Kriminalidade Organizada, ita resjista prosesu foun ho 710 prosesu iha nivel nasional,” informa PJR Jose da Costa Ximenes.

PJR hatutan iha Dili rejista iha fulan Setembru deit iha 174 ital prosesu, foun neebe tama, iha Baucau 103 prosesu neebe tama hanesan Suai iha 600 ital iha nivel nasional neebe MP resjista, konta ho fulan Agostu mos iha 300 ital prosesu.

Jose hatutan atividade nee suspende foin hahu servisu fila fali fulan Setembru ho loron 15 nia laran, no majestradu sira konsege finaliza prosesu pelumenus 474 prosesu iha nivel nasional. Biar nunee tanba atividade suspende iha Agostu fo impaktu uitoan, tanba uluk nee PJR fo informasaun iha Jullu iha 280 ital prosesu pendente iha nivel nasional, agora MP pelumenus iha aumenta uitoan 351 prosesu maka pendente.

“Uluk bainhira, hau fo informasaun iha Jullu, ita iha 280 ital prosesu pendente iha nivel nasional, agora ita pelumenus iha aumenta uitoan 351 prosesu maka pendente, mais nunee prosesu sira hotu movimenta nafatin,” tenik nia.

Antes nee mos PJR informa ba Prezidente Republika Francisco Guterres Lú Olo kona-ba servisu Prokuradoria neebe halao durante ferias judisial.

Nunee mos durante ferias judisial husi 1 Agostu too 15 Setembru, Prokuradoria hamutuk ho Gabinete Sentral Kombate Korrupsaun no Kriminalidade Organizada halao servisu ternu hodi taumatan ba kazu omisidiu iha Vemasse, omisidiu iha Same, sona ema, iha Villa Nova, Baucau no kazu sunu uma no estraga veikula neebe akontese iha 13 Agostu, iha Nunira, Laga.

Enkontru PJR Jose da Costa akompana husi adjuntu Prokurador Jeral Republika Alfonso Lopes, halao enkontru ho Xefe Estadu Francisco Guterres Lú Olo hodi atividade MP komesa normal too ohin loron, depois ferias judisial, durante fulan rua.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here