Guarda Prisional Kontinua Halao Serbisu

Diretor Nasional DNSPRS-MJ, Amilicar Soares Seixas. (Foto: Espesial)

DILI, STLNEWS.co – Maski iha situasaun serka sanitaria, guarda prisional kontinua halao servisu hodi haree dadur neebe hetan kondenasaun husi tribunal.

“Iha situasaun Covid-19 nee ami husi prizaun tolu mantein serbisu hanesan orientasaun ministru liu husi Konsellu Ministru neebe deside katak, serbisu prisional tenke lao hodi asegura prizaun tolu, liu liu ba internadus ka dadur sira atu labele falta sira nia nesesidade han, hemu, toba, moras,” dehan Diretor Nasional DNSPRS-MJ, Amilicar Soares Seixas ba STL iha nia knaar fatin Caicoli, Tersa (16/03/2021).

Nia hatutan, prizaun tolu nee hamriik hanesan doutor seguransa polisia no serbisu sosial neebe iha, atu halao hodi atende maluk sira neebe dadur. Serbisu neebe halao hetan lina kordenasaun ho ministru no mos Sentru Integradu de Krize, tanba nee sempre hetan apoiu iha serbisu neebe sira halo.

Nunee iha situasuan nee kompania neebe fornese hahan ba prizaun lao normal, tuir prosedementu neebe estadu estabelese ona.

Diretor nee dehan, iha situasaun agora nee guarda prisional balu neebe halao serbisu mantein, no balu neebe folga iha hela munisipiu labele mai, no prosesu julgamentu sira kontinua oferese dadur sira ba julgamentu, tanba ho responsabilidade neebe sira iha.

Iha fatin hanesan Diretor Prizaun Becora, João Domingos dehan, guarda prisional sira kontinua halao serbisu turnu, tuir orariu neebe fahe ona.

“Guarda Prisional sira halao serbisu turnu balu tama iha kalan no balu tama iha loron, ami nia guarda prisional nain tolu maka iha area serka sanitaria sira labele mai halao serbisu ami konsidera, nain tolu mos ba iha sira nia munisipiu rasik Likisa nian sira labele tama mai, nain rua iha Manatutu no ida iha Baucau, agora nain rua tama ona tanba husu lisensa,” dehan Nia.

Nia esplika tan, iha mos orientasaun husi ministru atu guarda neebe idade boot labele mai serbisu, maibe balu kontinua ba nafatin serbisu, tanba sira iha esperitu neebe boot ba knaar neebe sira halao, no dadur neebe tinan boot sura hamutuk ho balu neebe moras hamutuk rua nulu resin.*

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here