Hakfodak Rei Povu

Deputada Bankada Fretilin, Nelia Menezes. (Dok: STL)

DILI, STLNEWS.co — Deputada bankada Fretilin kontinua kestiona asaun karidade neebe Prezidente Partidu CNRT Kay Rala Xanana Gusmão halo ba povu no konsidera aktu nee hanesan hakfodak hakoak no tanis rei povu tun sae.

Deputada Fretilin, Nelia Menezes liu husi intervensaun iha sesaun plenaria Segunda (19/10/2020/) iha Parlamentu Nasional (PN) dehan, depois Fretilin manan iha eleisaun 2007, CNRT mak ba ukun, ukun tinan 10 resin, ohin foin hakfodak tuun ba vizita inan aman, joven sira haree kondisaun povu nian hanesan bee mos, eskola, estrada neebe aat, tanis, hakoak rei tun, rei sae.

“Ita hakfodak hanoin buat bain-bain, tanba sa mak tinan barak lahadia kondisaun sira nee,” dehan Deputada Nelia iha nia intervensaun.

Tuir deputada nee eskola barak mak kondisaun aat, estudante sira barak sei tuur iha rai, maibe ohin foin mak hakfodak, ida nee moras.

Hatan ba kestaun nee, Deputada Bankada CNRT Virgina Ana Belo hatete, kestiona ba atividade maun boot Xanana nian, nee hatudu katak Fretilin sira tauk haree maun Xanana lao ba baze.

Nia hatutan Timor nee ema hotu nian, se mak hakarak ba, laiha ema ida bandu, i autoridade lokal sira mos hein hela se mak hakarak ba, neebe lalika kestiona maun boot Xanana nian atividade ajuda povu.

Nunee mos Deputadu Bankada CNRT Domingos Carvalho hatete, maun Xanana tun ba terenu nee lalori Fretilin ba hatete aat iha neeba, nunee mos lahatete aat PLP, maibe maun Xanana lori COVID-19 hatoo ba povu i aumezmu tempu halo mos asaun karidade ba povu sira, labarak mos fahe netik oituan ba povu sira.

“Xanana halo sosializasaun ba prevensaun COVID-19, laos hanesan ema seluk ba soran tun sae,” tenik Domingos.*

Reportajen: Guilhermina Franco/Domingas Soares
Editor: Ekipa STL

LEAVE A REPLY

Please enter your comment!
Please enter your name here