Halo Hela Orasaun, Rona Bispo Basilio Mate

DILI, STLNEWS.co – Padre Regional SVD iha Timor Leste, João Suban sente triste no hakfodak bainhira rona Bispo Dom Basilio nain Maromak bolu hikas ba nain nia kadunan santo lalehan.

Padre Regional João Suban SVD hato’o lian triste nee ba STL, liu husi telefone Sabadu (30/10/2021).

Nia hatete, primeiru sente triste no hakfodak tanba Bispo ho kondisaun diak maibe derepente rona deit nia mate.

“Hakfodak ida tanba foin lalais Bispo tuir ordenasaun iha Liquisa depois ba Zumalai no horiseik ba Same no nia diak hela maibe deperente iha minutu balun rona katak Amo moras, halo orasaun ba la kleur deit rona katak iis laiha ona, ida nee halo ita sente triste tanba lakon Bispo neebe mak iha esperensia matenek boot ida no mundu internasional mos konese,” dehan Padre Regional SVD nee.

Pe. João afirma, Bispo Basilio do Nascimento ema neebe mak matenek no sai mos mata dalan ba foin sae sira, Amo lulik sira, nomos ba povu iha Timor Leste laran tomak.

“Ita rona katak Bispo moras fuan ou kurasaun no sofre kurasaun kleur ona maibe nia kondisaun forte los,” katak nia.

Padre hatutan sira mos planu ona atu loke Parokia ida iha Uatucarbau no horikalan mak koalia ho Amo Parokia atu konvida Bispo ba halo Inagurasaun, maibe ohin rona Bispo husik ona mundu ida no planu no programa sira adia ba tempu seluk fali.

Bispu Baucau Dom Basílio do Nascimento moris iha Suai, Covalima iha loron 14 Juñu 1950, Moto pastoral Et Vocem Spiritu Sancto (Dan Menjadi Suara Roh Kudus), Ordenasaun 25 Juni 1977 (44 tahun, 127 hari) husi David de Sousa, Ordenasaun Bispo 6 Janeiru 1997 (24 tahun, 297 hari) husi Papa João Paulo II.

Amo Bispo Basilio hakotu iis Iha HNGV iha Sabadu (30/10/2021), bainhira hetan atakasaun kurasaun iha Zumalai. Labele evakua husi Aeroportu Suai Mai Dili tanba fasilidade la kompletu, nunee ohin dader mak foin evakua mai, maibe too deit oras rua balun, Amo Basilio hakotu iis ona.

(dgs)

LEAVE A REPLY

Please enter your comment!
Please enter your name here