Halo Remodelasaun Tenki Realiza

DILI, STLNEWS.co – Atu halo remodelasaun ba membru governu neebe servisu lalos tenki implementa, laos koalia deit hodi sai fali prometedor.

Diretor AJAR Jose Luis de Oliveira hatete, antes nee Primeiru Ministru deklara ona nia halo observasaun ba membru governu sira ida neebe servisu lalos sei hasai iha 160 dias nia laran, maibe la akontese agora koalia tan. AJAR husu atu pratika liafuan neebe koalia laos promete deit.

“Halo remodelasaun nee promete deit, hau hakarak mak nee, hakarak haree asaun konkretu a pratica e criterio de verdade, o nia hahalok nee mak bele justifika katak o koalia nee los ka sala, agora hau hein hela nee a pratica e o verdade,” lia hirak nee nee hatoo husi Diretor AJAR, Jose Luis de Oliveira ba STL iha nia knaar fatin Farol, Kuarta (10/01/2024).

Nia hatete, labele koalia beibeik deit, maibe nia realidade oin seluk, la akontese tuir saida mak koalia nee, tanba nee bainhira koalia tenki tau iha pratika.

Nia hatutan, tuir nia haree oras nee daudaun mosu problema barak iha governasaun nee, hanesan aimoruk laiha, pasaporte hotu, no seidauk rezolve problema profesores sira nomos sasan folin sae makaas, ida nee Xefi Governu presiza haree hodi foti asaun, nunee bele rezolve problema neebe iha.

Nunee mos Tuir Visi Diretor Hak, Antonino de Limas katak, atu halo remodelasaun ba membru IX Governu sira nee kompetensia husi Primeiru Ministru.

“Tuir hau nia pontu de vista atu hatete, atu halo remodelasaun nee kompetensia Primeiru Ministru nia duni, karik nia haree nia membru governu sira la hatudu progresu iha sira nia servisu, nee kompetensia Primeiru Ministru atu halo remodelasaun,” katak nia.

Nia hatutan, Primeiru Ministru mos presiza halo avaliasaun didiak ba nia membru governu sira nia servisu, karik haree la diak iha pratika diak liu buka ema seluk hodi troka, nunee bele halo servisu ho diak hodi halo dezenvolvimentu no rezolve problema neebe oras nee sai polemika iha publiku.

(eme)

LEAVE A REPLY

Please enter your comment!
Please enter your name here