Hanaruk EE, Presiza Tau Atensaun Lina Fronteira Terestre, Aero, no Maritima

Vise Reitor III UNDIL, Hugo Lourenço da Costa. (Foto: STL/Crisogono Magalhães)

DILI, STLNEWS.co – Relasiona ho estensaun EE ba da ualu, rekomenda ba iha parte kompetente liu-liu ekipa neebe toma responsavel ba iha asuntu prevensaun surtu Covid-19, atu tau atensaun neebe masimu, ba iha lina fronteira terestre, aero, no maritima, tanba kazu hira neebe fooin lalais nee akontese, pasiente hirak nee kuaze tama husi ita nia lina fronteira. Hatete Vise Reitor III UNDIL, Hugo Lourenço da Costa ba STL iha nia knaar Fatin Maskarenhas, Dili, Kinta (10/12/2020).

“Iha EE ba da ualu nee ita presiza tau atensaun iha ita nia lina fronteira sira hanesan fronteira terestre aero, no maritima ho masimu hodi nunee ita bele halo prevensaun surtu Covid-19 hodi labele tan atu tama iha Timor,” dehan nia.

Nia dehan, ita konsege hamate sirkulasaun surtu Covid-19 iha Timor nee tanba ita hare ba iha implementasaun husi EE dahuluk to iha da hitu, ita nia povu nee kumpri duni, hodi lao tuir regras hira neebe iha.

“Hare ba iha ita nia ekipamentus saude nian no mediku sira ita disifisil tebes atu kontrola ho masimu, kompara ho nasaun avansadu sira seluk mesmu sira iha fasilidade neebe kompletu maibe sirkulasaun surtu Covid-19 lais los no hamate ona sira nia povu, tanba nee grasa deus ita nia natureza mos la fo fatin atu moras nee tama iha ita nia nasaun,” tenik nia.

Nia haktuir, ita hotu hatene katak antes nee Prezidente Republika, Francisco Guterres Lú Olo, iha loron 3 Dezembru 2020, dekreta tan estadu emerjensia da ualu ba loron tolu-nulu (30), hahu husi tuku 00.00 iha 4 Dezembru 2020 no termina iha tuku 23.59 iha 2 Janeiru 2021, iha territoriu nasional tomak.

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here