Harame Feira, Joven Tenki Garante Estabilidade

DILI, STLNEWS.co – Atu harame feira iha Tasi Tolu, husu ba joven sira nomos komunidade tomak tenki kria nafatin pas no estabilidade durante atividade feira nee lao.

Kestaun nee fo sai husi Xefi Suku Madohi, Bernadino do Cristo ba STL Domingu nee (11/06/2023) liu husi telefone.

“Hau apela beibeik ona ba joven nomos komunidade tomak iha bairo nee atu kria nafatin pas no establidade. Durante ita nia feira semana rua lao, no hahu inisiu mai too agora buat hotu sei lao diak, seidauk iha problema. Nee hatudu katak ita nia povu matenek, kumpri duni saida mak ita hakarak, feira ka jogu bila gulin lao tanba selu taxa ba kofre estadu,” dehan nia.

Nia afirma, jogu bola gulin neebe realiza iha fatin ida nee, laos foin mak halo, maibe beibeik ona no buat hotu sempre lao diak, tanba ema hotu kopera, no feira nee laos vantejen ba deit estadu liu husi selu taxa, maibe fo mos rendimentu ba negosiante kiik sira neebe faan sira nia sasan, bele haknaok netik osan rahun ruma, liu husi rendimentu neebe sira hetan.

Tuir nia, feira nee loke ho objetivu atu komemora loron restaurasaun independensia ka 20 de Maiu, neebe liu ba tiha ona, lo-loos loke iha momentu neeba, maibe feira nee loke tarde tanba despaixu husi ministeriu tun tarde oituan, tan nee foin realiza semana ida.

Iha parte seluk, Adriano da Costa hanesan seguransa ba feira nee hateten, semana ida ona feira nee lao, no buat hotu lao diak tebes, tanba joven iha Tasi Tolu sempre unidade iha atividade saida deit, tantu iha atividade igreza nomos atividade estadu nian.

“Semana ida ona, atividade feira iha Suku Madohi, Aldeia Terra Santa lao diak, tanba joven unidade tebes, tanba seguransa ba atividade nee mai husi joven sira hotu, nomos hetan apoiu seguransa husi ita nia PNTL,” dehan nia.

Tuir observasaun STL nian iha terenu haree katak, feira iha Tasi Tolu domina liu ho jogu bola gulin, duke grupu arte jenatu, tan nee ema neebe faan produtu lokal menus tebes, no feira nee mos lori rendimentu ba negosiante roda 3 neebe faan sasan.

(mad)

LEAVE A REPLY

Please enter your comment!
Please enter your name here