Harii Edifisiu PNTL Uma Kain 11 Sei Sofre, Rede Ba Rai Kesar Ba PN

Organizasaun Rede ba Rai kesar ba deputadu sira iha komisaun A trata asuntu konstitusionais no justisa Parlamentu Nasional (PN), atu haree komunidade uma 11 iha Caicoli, neebe Governu atu hasai hodi halo edifisiu PNTL. (Foto: STL/Guilhermina Franco)

DILI, STLNEWS.co – Organizasaun Rede ba Rai kesar ba deputadu sira iha komisaun A trata asuntu konstitusionais no justisa Parlamentu Nasional (PN), atu haree komunidade uma 11 iha Caicoli, neebe Governu atu hasai hodi halo edifisiu PNTL.

Kestaun nee hatoo husi Pedrito Viera, Koordenador Organizasaun Nasional Rede ba Rai katak, ohin dader sira mai hasoru komisaun A iha PN atu levanta kazu rai komunidade sira iha Caicoli, relasiona ho projetu ba edifisiu PNTL Timor-Leste nian.

Tanba nee mak sira mai hasoru komisaun A, hodi informa ba sira katak fo hatene ba Ministeriu Justisa, Terras Proriedades no mos ba instituisaun neebe mak iha relevante ho asuntu nee, katak kuandu atu implementasaun projetu ruma karik tenke liu husi regras neebe mak vigora ona.

“Ami koalia konaba prosesu oinsa komunidade sira neebe atu sai husi sira nia rai, ida nee koalia desde 2013 mai too sira hasoru dezafiu barak hanesan presaun psikolojia tanba komunidae sira hetan ameasadu atu hases sira husi sira nia rai,” informa Pedrito ba jornalista, Kuarta (24/02/2021) iha PN.

Nia hatete, iha oportunidade ida nee komisaun A, halo reativu positivu tebes, tanba sira rona esplikasaun konaba prosedimentu legal sira bainhira atu hasai komunidade.

Tuir nia, deputadu sira iha komisaun A nee sira dehan atu halo ajenda hodi bolu Ministeriu Justisa hodi husu aktu neebe durante nee halo ba komunidade.

Nia dehan, komunidade sira nunka hanoin atu kontra planu estadu nian, maibe bainhira atu hasai komunidade sira nee tenke la tuir regras hanesan, kokunidade sira nain ba rai tenke halo negosoiasaun ho sira atu bele buka solusaun neebe mak justu no dignu, tanba dadauk nee komunidade sira tauk loos tanba sira hetan ameasa husi komandante PNTL katak fo ultimatu ba komunidade sira iha area neebe kata tenke sai husi sira nia fatin.

Maske atu hasai komunidae sira nee maibe seudauk fo indimizasaun, Governu koalia katak atu fo indimizasaun ba sira tanba ne husu atu sira loke konta bankaria, maibe tanba seidauk iha aproximasaun neebe diak no komunikasaun ba konkordansia neebe mak diak, maibe Governu obriga deit kata loke konta bankaria atu nunee bele transfere osan indimizasaun, ida nee halo komunidade sira mos hakfodak tanba prosesu ba komunikasaun ka negosiasaun seidauk iha.

Tuir nia, komunidade sira iha uma kain 22, neebe agora dadaun prosesu ba oin iha huat barak neebe sira nudar Rede ba Rai apoiu juridiku ba komunidade sira. Primeiru sira keixa ona ba Prokurador Jeral no mos keixa politika ba Komisaun A iha PN, atu sira bele lori problema nee ba debate iha nivel nasional neebe nia husu atu diak liu bolu Ministru Justisa halo klarifikasaun ba aktu durante nee.

Nunee mos Prezidente komisaun A trata asuntu konstitusionais no justisa, Joaquim dos Santos hatete, ohin komisaun A simu bainaka ida husi organizasaun Rede ba Rai lori sidadaun grupu ida nia interese mai aprezenta ba komisaun, atu konsidera direitu balu neebe lei proteje ba sidadaun sira.

Konaba problema ba rai ida komunidade iha Caicoli, Ministeriu Justisa hakarak hasai sidadaun sira nia direitu balu iha rai nee atu hodi halo fali edifisiu PNTL nian, prosesu nee kleur ona tanba nee sira husu ba PN atu haree.

Sura lakontra desizaun politika atu halo dezenvolvimentu, maibe desizaun politiku neebe Governu foti nee presiza lao tuir lei haruka tanba iha lei fo obrigasaun ba governu, maibe iha mos lei fo protesaun ba direitu sidadaun.

“Sira husu atu PN konsidera hodi haree karik atu implemeta lei karik tenke haree mos ba efeitiunegativu no pozitivu. Iha uma 10 resin mak afeita ba desizaun politika nee, neebe komisaun A depois rona komisaun mos hanoin hela atu rona tan Ministeriu Justisa iha tempu oin mai molok komisaun halo paraser,” informa Joaquim.

Tuir nia, lei neebe iha, kuandu Governu atu hasai sira nia sidadaun tenke iha justa indimizasaun nee iha konstituisaun mos koalia, neebe importante mak populasaun ho Governu rona malu hodi halo dezenvolvimentu.*

Reportajen: Guilhermina Franco/Domingas Soares
Editor: Ekipa STL

LEAVE A REPLY

Please enter your comment!
Please enter your name here