Harii Tribunal Distrital; Tribunal Movel Fo Todan Despeza Estadu

DILI, STLNEWS.co – Jurista Sergio Dias Quintas hatete, atu lori justisa hakbesik liu tan ba povu, presiza kria tan Tribunal Distrital iha munisipiu sira neebe too oras nee dadaun seidauk estabelese.

“Importante harii Tribunal Distrital tanba durante ne justisa konsentra deit iha kapital Dili, no munisipiu balu neste momentu munisipiu barak mak seidauk iha Tribunal entaun importante tebes hodi estabelese Tribunais Distritais hodi hakbesik justisa ba povu neebe vulneravel, tanba laiha osan atu desloka mai kapital,” dehan Jurista Sergio ba STL, iha TDD, Kuarta 05/05/2021.

Nia hatutan, labele nega justisa ba ema ida, tanba deit nia la iha kbiit osan nian, tuir artigu 26 konstituisaun RDTL.

Jurista nia haree, Tribunal movel nee, apenas gasta osan deit, tanba fo todan ba despeza estadu, melhor forma mak harii tribunal iha munisipiu hodi sira halo serbisu permanente iha povu nia leet, tanba tribunal movel provizoriu deit apenas julga ba kazu krime kikoan, tribunal movel la atende konaba kazu sivil.

Iha fatin ketak, Akademika UNTL Romerio Maria dehan, kria tribunal distrital ida nee bele lori justisa hakbesik liu ba povu, maibe presiza mos rekursu umanu.

“Hanoin bele hotu, mas ita tenke hare mos ba rekursu umanu neebe iha, se rekursu umanu seidauk sufisiente, taun prepara uluk lai rekursu umanu, foin bele hare planu nee,” dehan nia.

Akademika esplika tan, ohin loron estudante neebe remata iha area direitu barak, maibe oinsa sira prepara sira nia aan, atu kompete ba iha kareira judisial nian, tanba presiza ema neebe matenek no servisu ho profesional.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

%d bloggers like this: