Hasai Imunidade, Antonio: “Hau La Hases Aan Husi Responsabilidade”

Xefe Bankada PD, Antonio da Conceição. (Foto: Espesial)

DILI, STLNEWS.co – Xefe Bankada PD, Antonio da Conceição afirma, sei la hases aan ka la hakiduk husi nia responsabilidade, bainhira Parlamentu Nasional hasai ninia imunidade hodi ba hatan iha tribunal.

Nia dehan, karta nee mai ona, hanesan Prezidente PN hatete, nia parte klarifika ona katak, seidauk foti levantamentu ba imunidade nee iha Dezembru tanba debate OJE, ida nee laos tanba PN mak lakohi foti. Konaba atu halo ajenda ba hasai imunidade nee laos nia kompetensia, maibe nee iha lider bankada mak deside.

“Hau koalia ona ho PPN atu dia 8 de Abril hau ba hatan no hau husu mos ba Prezidente komisaun A, atu mos fo hanoin, katak tenke halo, tanba hau nuudar sidadaun neebe tenke iha responsabilidade, tanba hau laos komvidadu mak mai iha nee, atu hodi hases hau nia aan husi responsabilidade nee lae,” deklara Deputadu Antonio ba jornalista, iha PN, Dili, Kinta (04/03/2021).

Nia haktuir, konaba atu suspende nia mandatu, bainhira ba hatoo deklarasaun iha Tribunal, nee levantamentu depende ba PN. Enkuantu konaba suspende mandatu sira iha imunidade ida neebe mak atu bele lahatan ba buat sira kriminal nian, tanba nee mak tenke foti imunidade hodi bele ba hatan.

“Hau hanoin tenke foti tanba hanesan mos iha dia 14 Janeiru liu ba, prokurador ida mos komenta katak, karik lafoti nafatin imunidade, nee bele lori kazu sai arkivu deit, maibe labele tenke foti duni imunidade”, tenik nia.

Tuir Xefe Bankada nee katak, imunidade tenke foti, tanba kazu nee iha 2014 nian, no kleur ona tanba agora 2021 tinan 7 ona, labele kontinua husik deit.

Iha parte seluk, Prezidente Parlamentu Nasional, Aniceto Guterres antes nee hatete, tribunal haruka tan karta ida ba PN, konaba data julgamentu deputadu Antonio da Conceição iha dia 8 Abril. Neebe PN mos sei halo ajenda ba hasai imunidade deputadu Antonio da Conceição.*

Reportajen: Guilhermina Franco / Domingas Soares
Editora: Carme Ximenes

LEAVE A REPLY

Please enter your comment!
Please enter your name here