Hasoru Dezafiu, Fuan Tenke Forti

Diretor Ezekutivu Assosiasaun Defisiensia Timor Leste (ADTL), Cesario da Silva. (Foto: STL/Jacinta Sequeira)

DILI, STLNEWS.co – Moris iha mundu tenke hasoru dezafiu oin oin, tanba nee ema ho defisiente presiza iha fuan neebe forte para hasoru dezafiu hirak nee.

Lia hirak nee hatoo husi Diretor Ezekutivu Assosiasaun Defisiensia Timor Leste (ADTL), Cesario da Silva, ba STL iha nia knaar fatin ADTL Mascarinhas, Dili, Tersa (23/03/2021).

Nia dehan, mensajen primeiru ba maluk defisiente sira katak, moris nee la fasil, maibe sempre hasoru dezafiu oin oin,tanba nee, tenke fuan forti, para bele hasoru dezafiu sira nee, liu-liu ema defisiente sira neebe hasoru dezafiu barak.

“Sosiedade mai ho pensimentu ida katak, ema ho defisiente labele halo buat ida, maibe merese deit apoiu situasaun sira hanesan nee, ita tenke forti hodi hasoru, tanba nee husu ba maluk defisiente sira tenke forti, hasoru dezafiu ida nee, para bele avansa ba oin. ADTL nian planu prioridade mak atu mellora no fortifika liu tan ezistensia organizasaun iha TL, ami nian vizaun boot liu atu iha sentru defisiente iha Dili, atu asegura ema defisiente iha area remotas sira nee bele hetan hotu,” dehan nia.

Cesario sublina sira nian prioridade ba tinan ida nee mak sira sei nafatin esforsu, asegura lian defisiente forti liu tan, laos tanba ADTL ho nia membru sira mak koalia, maibe oinsa sira nafatin fo informasaun ba maluk defisiente sira, liu-liu hirak neebe dadaun nee hela iha area remotas, no la asesu informasaun.

Iha fatin seluk, Francisco Maia de Jesus, hanesan defisiente dehan, moris nee ema hanesan deit, maibe sosiedade sira mos presiza respeita no konsidera ema defisiente sira, oinsa labele mosu diskriminasaun ba defisientes, dala ruma diskriminasaun nee mosu husi inan aman sira.

“Iha hau nia familia, hau sempre koalia, hau presiza imi nian motivasaun no korazen nafatin hau, tanba hau moris ho kondisaun neebe diferente ho hau nian maun alin sira, maibe hau simu ida nee, husu nafatin familia nia apoiu no korazen nafatin hau,” dehan nia.*

Reportajen: Jacinta Sequeira/Blandina Mauno
Editor: Ekipa STL

LEAVE A REPLY

Please enter your comment!
Please enter your name here