DILI, STLNEWS.co – Prezidente Republika (PR) eleitu Jose Ramos Horta hasoru malu ho atual Prezidente Republika Francisco Guterres Lú Olo, hodi kumprimenta no koalia mos konaba preparasaun tomada de pose neebe realiza iha Tasi Tolu no koalia mos loron 20 fulan Maiu nian.
Wainhira remata hasoru malu, prezidente eleitu Jose Ramos Horta ba jornalista iha Palasiu Prezidente Bairru Pite, Kuarta nee (27/04/2022) hatete, ohin hasoru malu ho PR Lú Olo hodi kumprimenta, iha biban nee koalia mos konaba preparasaun ba tomada de pose nia no mos loron 20 fulan Maiu nian.
“Hau foin hasoru nai Prezidente Lú Olo, primeiru enkontru normal koalia rezultadu konfirmadu husi Komisaun Nasional ba Eleisaun (CNE – sigla portugues), mai aprezenta hau nia kumprimentus ba prezidente simu hau ho delegasaun diak tebes pozitivu nudar lideransa nasional,” dehan PR Eleitu Jose Ramos Horta.
Nia dehan, hasoru malu premeiru objetivu koalia konaba serimonia tomada de pose nia neebe mak halao iha loron 19 fulan Maiu no mos loron 20 fulan Maiu para lao ho diak ho dignidade ba estadu no povu sosiedade nia, buat hotu lao daudaun hela husi ekipa prezidensia ho Estatal ho entidade seluk neebe partisipa iha prosesu nee.
“Hau hatete ba prezidente, hau nia admirasaun respeita ba prezidente oferese aan para ba oin buat neebe prezidente presiza hau nudar Xefi Estadu nudar individual bele konta ho hau, hau mos espera ke kaer ho knaar nee, hau sei konsulta ho prezidente ba oin kestaun nasional ho kestaun internasional sempre buka rona ninia sesante,” dehan nia.
Nunee mos planu no programa ba loron 19 fulan Maiu no loron 20 fulan Maiu nee oras nee Estatal mak responsabiliza no halo ona kordenasaun, no ekipa husi kandidatu eleitu Jose Ramos Horta tim tranzisaun ba eventu neebe mak halao iha Tasi Tolu no mos eventu neebe mak halao iha palasiu mos.
Iha biban nee, Prezidente Republika Francisco Guterres Lú Olo hatete, oras nee nia mos prepara hela wainhira hasoru malu ona ho PR eleitu sei marka tempu hodi entrega mos relatoriu ba PR eleitu Jose Ramos Horta.
Nunee mos Ministru Administrasaun Estatal, Miguel Pereira de Carvalho hatete, konaba preparasaun ba selebrasaun tomada de pose nee responsablidade husi Estatal, maibe sei servisu hamutuk mos ho ekipa husi PR eleitu.
(eme)
