Horta: Loke Abertura Eventu Kail ba Dame ba Da Tolu

Eis Prezidente RDTL Dr. Jose Ramos Horta loke abertura eventu Kail ba Dame ba da tolu hodi komemora loron invazaun Indonezia mai Timor Leste. (Foto: STL/Crisogono Magalhães)

DILI, STLNEWS.co – Eis Prezidente RDTL Dr. Jose Ramos Horta loke abertura eventu Kail ba Dame ba da tolu hodi komemora loron invazaun Indonezia mai Timor Leste.

“Primeiru hau fo parabens ba joven sira no agradese mos ba duadores sira hanesan UNDP, Timor Telecom no seluk-seluk tan neebe fo apoiu tomak ba atividade nee,” dehan Loreadu Nobel da Paz hafoin remata abertura ba eventu Kail ba Dame ba jornalista sira, iha Sentru Konservasaun Mangrove Hera, Dili, Sesta (04/12/2020).

Loreadu Nobel da Paz nee dehan, atividade nee tuir lolos apoiu nee mai husi governu, tanba PM Taur Matan Ruak, ema ida ke uluk kedan nia iha inisiativa halo Meio Ambienti.

“Tanba nee atividade ida ke diak nunee presiza apoiu tomak husi parte governu,” haktuir Horta.

Entretantu, Dede Figueredo hanesan partisipante, nia hatete eventu nee importante tebes.

“Eventu ida nee importante tebes, tanba liu husi eventu nee oinsa ita bele halo sosializasaun ba ita nia sosiedade no komunidade sira hotu, para sira bele iha konsiensia hodi asegura ita nia ambienti liu-liu iha tasi nian,” tenik nia.

Husi observasaun STL nia iha terenu atividade Kail ba Dame nee rasik organiza husi RYLA Timor Leste, Konservasaun Flora no Fauna (KFF), Leste News, Diariu Independen no Jerasaun 12 de Novembro neebe hetan apoiu no kolaborasaun husi, Komponente Naval Hera (F-FDTL), Ministeriu Agrikultura, Cinema Lorosae, Super Bock, UNDP, Timor Telecom, AUSAID, BNCTL no Del Beto Yoghurt.

Total partisipante neebe hola parte iha eventu Kail ba Dame hamutuk ema nain Sanulu Resin haat (14).*

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here