Horta-Membru Governu Hatoo Sentidu Kondolensia Ba PM

DILI, STLNEWS.co – Prezidente Republika Jose Ramos Horta hamutuk ho membru VIII Governu hatoo sentidu kondolensia ba Primeiru Ministru (PM) Taur Matan Ruak ho familia, tanba lakon feen kaben, inan no bin alin diak ida, Doutora Isabel da Costa Ferreira.

Matebian Isabel da Costa Ferreira, espouza husi Primeiru Ministru Taur Matan Ruak fila hikas ba iha Nai nia kadunan Santu, iha loron Domingu kalan (18/06/2023), oras 20:48, iha rezidensia Metiaut, Dili.

Iha biban nee, Ministru Defeza Filomeno da Paixao de Jesus ba STL iha residensia PM Taur, Metiaut, Dili, Segunda nee (19/06/2023) hatete, ohin sira mai hatoo sentidu kondolensia ba familia enlutada, liu-liu Primeiru Ministru Taur Matan Ruak nomos oan sira neebe lakon feen no inan diak ida iha sira nia leet.

“Ami mai iha nee hatoo ami nia sentidu kondolensia ba Primeiru Ministu Taur Matan Ruak ho familia, tanba lakon nia kompanheira parseira moris, no senhora Espoza PM mos durante nee sofre moras ida todan, agora ba moris ona iha rohan laek, iha Nai nia kadunan santo,” dehan ministru nee.

Iha biban nee, Ministru dehan, senti tristi tanba lakon ema ida neebe mak durante nee fo mos nia kontribuisaun makaas, hodi luta ba direitu humanus.

Nia ema ida ativista durante nee servisu hamutuk ho Prezidente Republika, agora nomos Prezidente Parlamentu Nasional neebe servisu makaas hodi luta ba direitus.

Nunee mos Mediku João Teodoso hatete, Matebian Isabel da Costa Ferreira durante nee sofre hela moras kankru intenstinu neebe mak tama ona iha faze termina.

“Atu informa deit ba ita boot sira katak, Dra Isabel da Costa Ferreira hahu halo tratamentu iha Klinika Hospital, Singapura, hahu kedas tinan kotuk iha 9 de Abril 2022, durante nia estajiu iha Singapura kontinua nia tratamentu no ho operasaun, no halo tratamentu kuaze tinan ida,” dehan nia.

Mediku nee afirma, durante nee halo tratamentu tinan ida iha Singapura, no ikus matebian rasik mak desidi hakarak fila mai Timor hodi halo tratamentu iha Timor deit, tanba nee mediku sira koordena ho Hospital Nasional Guido Valadares (HNGV) desidi mediku nain 4 mak destaka iha rezidensia PM hodi halo tratamentu ba saudoza.

Ho moras neebe nia sofre la konsege salva, ikus mai iha loron 18 Junhu 2023, iha oras 20:48, Nai bolu hikas ba Nai nia kadunan Santu iha leten aas ba.

Tuir observasaun STL, Matebian Isabel da Costa Ferreira feen kaben Primeiru Ministru Taur Matan Ruak, moris iha Same, Munisipiu Manufahi, iha 15 Abril 1974. Oan husi Mateus Ferreira no Ana Flora de Jesus Ferreira. Saudoza hakotu iis ho idade 49 no husik hela oan nain tolu, saudoza iha maun alin nain 13.

(eme)

LEAVE A REPLY

Please enter your comment!
Please enter your name here