DILI, STLNEWS.co – Igreja Katolika Timor Leste liu husi Konferensia Episkopal Timorense (CET – sigla Portugues) husu kandidatu Prezidente Republika (PR) Jose Ramos Horta no Francisco Guterres Lu Olo atu simu rezultadu eleisaun prezidensial segunda volta periodu 2022-2027 ho fuan boot.
Koordenador Jeral ba Programa Edukasaun Sidadania, Pe. Domingos Soares Maubere hatete, iha eleisaun prezidensial segunda volta nee kandidatu ida sei manan no lakon tanba nee husu atu simu rezultadu nee ho fuan boot.
“Iha festa demokrasia nee ema hotu sei partisipa ho haksolok, maibe kandidatu sira nee ida sei manan no lakon, tanba nee iha kompetisaun sira hanesan nee ita tenki fuan boot nafatin no pronto atu simu manan ga lakon, ida sei nee hatudu ita nia fuan boot no esperitu ema neebe mak moris iha sosiedade nia laran,” dehan Koordenador Jeral ba Programa Edukasaun Sidadania, Pe. Domingos Soares Maubere iha salaun Episcopal Balide, Dili, Segunda nee (18/04/2022).
Pe. Domingos Maubere afirma, kandidatu ida neebe lakon sei iha nafatin oportunidade atu kompete nafatin wainhira manan hodi halao knaar hanesan xefe estadu hodi serbi povu no rai ida nee.
Entretantu iha eleisaun prezidensial primeira volta, kandidatu Prezidente husi partidu FRETILIN, Francisco Guterres Lú Olo ho nia votu 144.282 ho nia persentajen 22,1%, no kandidatu Prezidenti Republika husi partidu CNRT, Jose Ramos Horta ho nia votu 303.477 ho nia persentajen 46,6%.
(alb)