DILI, STLNEWS.co – Igreza husu lider partidu politiku (Parpol) sira promove espiritu fraternidade iha kampanha, nunee bele eduka povu ho foinsae sira iha nasaun nee.
Kestaun nee hatoo husi Arse Bispu Metropolitana Dili, Dom Virgilio Kardeal Do Carmo Da Silva ba jornalista sira, bainhira remata partisipa serimonia komemorasaun aniversariu dala uluk adezaun Timor Leste no deklarasaun dala uluk dokumentu Fraternidade Humana iha Parlamentu Nasional, Tersa nee (25/04/2023).
Arse Bispu hatete, espiritu fraternidade neebe mak selebra halo primeiru aniversariu neebe legalmente parlamentu adopta, buat nee hotu konvida ema hotu atu tau iha kampanha sira nee, hanesan dala barak dehan hanaran kampanha eleitoral, nee festa demokrasia, festa ema hotu kontenti, ema hotu haksolok no partisipa, ema hotu kontenti tanba iha neeba laiha ema hatauk malu, hamoe malu, laiha ema hatun malu, tanba ho espiritu respeita malu.
“Neebe ita hakarak espiritu demokrasia ida nee ita senti duni iha fulan ida nee, bainhira ita hakaas aan duni liu-liu nain politiku sira hakaas aan duni atu promove espiritu ida nee mak bele hakiak ambiente atmosfera neebe diak ba ita nia rai, sai mos hanesan oportunidade atu eduka joven sira, eleitores sira, iha ita nia pais, ami mos enkoraza ema hotu atu hakaas aan liu-liu atu promove espiritu fraternidade iha kampanha politika nia durante fulan ida nia laran,” katak nia
Iha biban nee, bibi atan uma kreda katolika nee mos fo mensajen ba iha partidu politiku sira, nafatin promove espiritu fraternidade no tun kampanha diak liu hatoo planu no programa deit no redus insulta malu iha palku.
Nunee mos Prezidente Republika Jose Ramos Horta husu lider partidu politiku sira atu bele hemu didiak mensajen fraternidade, nunee bele haklean dame iha rai laran.
“Lider politiku nasional sira hemu didiak mensajen ida nee para rai nee haklean dame, ba oin halo rai nee hanesan ilha ida fraternidade, tera ida solidaridade, hotu-hotu servisu para hamate tiha kiak iha Timor leste,“ katak PR Horta.
Prezidente hatete, se simu duni fraternidade humana, prioridade ida mak tau matan ba vizinhu sira kiak rabat rai nee laos fo deit esmola, maibe halo politika diak nunee sai husi kiak, maibe ida nee tenki liu husi konsensus nasional.
Prezidente Republika mos fiar laiha partidu politiku ida la konkorda ho fraternidade humana iha rai laran hodi promove pas.
(eme)
