Implementa Lalais Programa Vasinasaun

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Prezidente Republika Francisco Guterres Lú Olo husu governu atu implementa lalais programa vasinasaun, nunee bele kombate moras Covid-19 iha rai laran.

“Ho laran haksolok mak hau simu informasaun katak Timor Leste sei simu vasina oferese husi parseiru dezenvolvimentu sira,” hatete Prezidente Republika Lú Olo ba jornalista liu husi mensajen iha Palasiu Prezidente Nicolau Lobato, Bairru-Pite, Sesta (19/03/2021).

Aman nasaun nee hatutan, governu Timor Leste mos buka hela dalan atu sosa vasina ho osan rasik, no nunee populasaun tomak Timor Leste bele simu vasina no proteje aan hasoru moras at nee. Ho medida sira nee mak bele prevene no kombate moras Covid-19 nee.

Relasiona ho preokupasaun povu hakilar hela ba hahan, PR husu governu atu kria mekanismu lalais ba populasaun sira.

“Atu hatan lalais ba povu nia halerik, hau husu atu governu kria mekanismu lalais, liuliu ba sira neebe laiha rendimentu, atu bele hetan asesu ba hahan lor loron nian, maibe respeita nafatin medida prevensaun no kontrola Covid-19,” dehan PR.

Prezidente Republika nee husu ba ema hot-hotu, liuliu ba lider politiku sira, padre no madre sira, profesor, lider, komunidade sira nian, aman inan sira no responsavel servisu iha setor publiku no setor privadu, atu sai ezemplu diak ba populasaun tomak konaba uza maskra beibeik, taka ibun no inus tomak, fase liman ho sabaun bebeik. Labele kaer matan, inus no ibun, molok fase liman, no hadook aan malu minimu metru ida. Katak labele hamriik besik malu, lalika kaer liman, hakuak malu, bensa liman no rei malu.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here