Implementa Serka Sanitaria, Horta Simu Kontaktu Barak Husi Joven

Eis Prezidente Republika, Jose Ramos Horta. (Foto: Espesial)

DILI, STLNEWS.co – Eis Prezidente Republika, Jose Ramos Horta hatete, durante governu implementa serka sanitaria no konfinamentu obrigatoriu, nia simu kontaktu barak husi joven sira, kona ba hamlaha.

Dehan Horta ba jornalista, bainhira remata ho Prezidente Republika, iha Palasiu Prezidente Nicolau Lobato, Bairru Pite, Dili,Tersa (30/03/2021).

“Hau simu kontaktu barak husi joven balun, hau hakfodak hau husu ba sira imi simu sesta bazika kalae, sira hatete ami simu duni maibe araska. Balun simu, no balun seidauk simu too agora.” hatete Premiadu Nobel da Paz nee.

Horta mos rekonese povu hasoru problema, liu liu sira neebe mai husi foho. “Hau fiar ita iha problema, liu liu iha foho, governu hatete sai ona atu haree, medidas nee importante tebes,” tenik nia.

Nia hatutan, konaba implementa serka sanitaria nia mos konkorda atu estende serka sanitaria, nunee bele prevene Covid-19 iha rai laran.

“Nee hau konkorda tenke estende tanba ita hatene, liu liu taka fronteira, atu metin liu tan multa todan ba ema neebe viola ita nia lei regra no lei estadu emerjensia, no lei omigrasaun tama ilegal iha fronteira. Ita sorte ona tinan ida resin ona laiha ema ida mate,” hatete nia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here