Implementadores Programa Sesta Bazika Tenke Tuir Estandar

Xefe Bankada FRETILIN, Deputadu Francisco Miranda Branco. (Foto: STL/Domingas Soares)

DILI, STLNEWS.co – Bankada FRETILIN iha Uma Fukun Parlamentu Nasional, husu ba implementadores programa sesta bazika tenke ho kualidade no tuir estandar, tanba projetu hotu hotu laiha ida prefeitu.

Prezidente Bankada FRETILIN Deputadu, Francisco Miranda Branco afirma, programa sesta bazika, programa ida neebe diak sei lori inisiativu diak ba produtores sira, lori mos motivasaun diak liu tan ba komersiante ka faan nain sira hodi hadia moris uma kain idak-idak nian.

“Maibe iha programa hotu-hotu iha implementasaun projetus hotu-hotu laiha ida prefeitu, agora kabe ba sira neebe implementa no ejekuta hanesan emprezarius sira neebe simu fiar hodi sosa produtus husi produtores sira, sira maka tenke kuidadu didiak fornese produtu neebe ho kualidade diak ho folin mos tenke tuir estandar, labele lori menan liu ba iha balu depois prezudika fali kestaun presu iha aban bain rua nian,” dehan nia ba jornalista, iha PN, Kinta (17/12/2020).

Nia akresenta, agora implementasaun programa sesta bazika nee mos nakloke midia mos tuir, Alfaesa mos tuir no entidades hotu bele supreviziona auditoria husi sosiedade sivil mos tuir, hotu-hotu akonpania ezekusaun projetu ida neebe nakloke ba ema hotu atu bele haree.

Hanoin governu maka kabe responsablidade hodi akompania situasaun ida nee, hodi bolu nafatin atensaun ba implementadores no emprezarius sira hotu neebe simu fiar, atu ezekuta programa ida nee tenke ezekuta ho diak.

“Se iha buat ruma naksalak tenke bolu atensaun hodi hadia, kuandu ezekusaun programa ida nee lao dadaun ba oin,” tenik nia.

Nia hatutan, governu entrega ba empreza sira neebe fornesedor ba ezekusaun programa ida nee sira sosa produtu sira nee, husi produtores sira iha baze no iha fatin neebe deit husi kooperativa sira nia produsaun.

Reportajen: Domingas Soares/ Guilhermina Franco
Editora: Carme Ximenes

LEAVE A REPLY

Please enter your comment!
Please enter your name here