Importador 4 Simu Primaduta Award Husi Governu Indonesia

DILI, STLNEWS.co Ministeriu Komersiu Republika Indonezia liu husi Embaixada Republika Indonezia iha Dili, Timor Leste, oferese apresiasaun Primaduta Award ba Kompanhia haat (4) iha Timor Leste.

Kompanhia 4 neebe simu apresiasaun Primaduta Award hosi Governu Indonezia nee mak hanesan, Indofood CBP Sukses Makmur (IOD Lorosae) lidera hosi Harry Agusa (Regional Manager), Hii Pot Corporation, Lda, lidera hosi Adrianus Soedijopranoto, Ocean Line Unipessoal, Lda, lidera hosi Claricia Lay no Kara Dejoy, LDA, lidera hosi Oktavianus Lay Khim Fa.

Apresiasaun Primaduta Award nee diretamente intrega hosi Embaixador Republika Indonezia ba Timor Leste, Okto Dorinus Manik  liuhosi serimonia entrega apresiasaun Primaduta Award no Sosializasaun Lei Impostu Indonezia no Lei Traballador Timor Leste nian iha Centru Cultura Indonezia ka Pusat Budaya Indonezia (PBI) Kaikoli, Dili, Kinta (22/6/2023).

Serimonia nee organiza hosi KBRI Dili servisu hamutuk ho komunidade emprezariu Indonezia iha Timor Leste neebe asisti hosi 170 konvidadus neebe maioria emprezariu no lideransa balun hosi Governu Indonezia no Timor Leste. 

Primaduta Award nee hanesan apresiasaun neebe Governu Indonezia oferese liuhosi Ministeriu Komersiu ba Eksportador/Importador eleitu hosi nasaun oi-oin, tanba konsistensia hasae  atividades negosiu ho Indonezia.

Embaixador Republika Indonezia ba Timor Leste, Okto Dorinus Manik liuhosi nia diskursu hato’o apresiasaun ba kompanhia haat neebe sai manan nain  no simu Primaduta Award hosi Governu Indonezia no apoiu hodi dudu emprezariu Indonezia no Timor Leste hodi hametin relasaun no kooperasaun iha area ekonomia.

Embaixador Okto Manik hatutan tan katak, hanesan nasaun vizinhu ho background kultura no relasaun amizade neebe metin, Timor Leste ho Indonezia atu apoiu malu hodi halao dezenvolvimentu iha setor oi-oin, liu-liu iha setor ekonomia.  

Tanba nee, katak Embaixador Okto Manik, papel emprezariu nuudar autor ekonomia importante tebes hodi hametin relasaun bilateral Timor Leste-Indonezia.

“Kada tinan Governu Indonezia liuhosi Ministeriu Komersiu sempre oferese sertifikadu ba emprezariu  hosi nasaun oi-oin neebe maka susesu iha area exportasaun no importasaun. Iha tinan ida nee, ita foin distribui sertifikadu Primaduta Award 2022 ba kompanhia 4 iha Timor Leste,” dehan Embaixador Okto Manik.

Nia dehan, iha serimonia nee realiza mos seminariu  ba emprezariu Indonezia, kona ba lei trabalhador neebe aplika iha nasaun Timor Leste no sosializa dekretu lei foun husi Indonezia ba Alfandega ho aplikasaun taxa exportasaun no importasaun atu nunee emprezariu sira hatene.

Nia haktuir tan katak, ba oin presiza hasae tan konektividade entre Indonezia-Timor Leste  liu-liu iha area transportasaun, liuhosi transporte Terestres, Transporte maritima nomos Aero ka aviaun nian. Hanesan tinan kotuk transporte maritima so uniku maka ro Meratus, maibe agora iha tan ro rua ona maka sempre hatama sasan husi Indonezia mai Timor Leste. Ida nee hanesan bisnis kompetitivu ho ninia porsi boot uitoan ona.

Iha area Aero nian, ohin loron iha ona aviaun Aero Dili, espera bele semo ba Surabaya hodi nunee bele mobiliza logistika mos bele liu husi aviaun, nunee mos iha fronteira terestres, presiza hasae tan ninia konektividade tanba oras nee dadaun iha ona transporte terestres Bus Babadok ho Damri Dili-Kupang, tanba nee husi alfandega  entre rai rua nee, presiza halo sosializasaun kona ba aplikasaun taxa, atu nunee emprezariu rai rua nee, bele hatene atu labele viola regras neebe aplika iha nasaun rua nee.

Entretantu, Xefe Komunidade Emprezariu Indonezia iha Timor Leste, Marly Yahya hato’o apresiasaun ba Primaduta Award neebe Governu Indonezia oferese ba Eksportador/Importador haat iha Timor Leste. Espera katak ho apresiasaun ida nee bele hametin liutan relasaun emprezariu hosi Indonezia no Timor Leste metin liutan iha futuru.

Aleinde entrega apresiasaun Primaduta Award ba kompanhia haat iha Timor Leste, halao mos seminariu bisnis kona ba lei impostu no alfandega ekspor/impor Indonezia no lei traballador Timor Leste. Seminariu ho tema” Haporti Konhesementu Lei no Sinerjia Desizaun no Impaktu ba Relasaun Ekonomia Indonezia no Timor Leste.

Iha seminariu nee, sira neebe sai orador mak Diretor Nasional SEFOPE Timor Leste, Jacinto Barros Gusmao no Setyono Nugroho Husi Instituisaun Avaliasaun Alfandega Atambua no I Gusti Ayu Agung Dwi Rismandayani  hosi Instituisaun Impostu Pratama Indonezia.

Iha oportunidade hanesan, Diretor Nasional SEFOPE, Jacinto Barros Gusmao hatete iha seminariu nee nia hakarak fahe informasaun kona ba lei trabalhador neebe aplika iha nasaun ida nee. Iha seminariu nee, sira mos fo sujestaun ba lei balun neebe maka uluk aplika ona, la nesesariu ona. Tanba nee, husi sujestaun sira nee sei lori ba diskusaun nivel altu, atu nunee, bele halo revizaun ba lei balun neebe maka ladun fo benefisiu ba sira nia negosiu hanesan investor iha nasaun Timor Leste.

(mik/jos)

LEAVE A REPLY

Please enter your comment!
Please enter your name here