Imunidade Ba Deputadu CNRT, PPN: Seidauk Iha Pedidu Husi MP

Prezidente Parlamentu Nasional (PPN), Aniceto Guterres. (Foto: Media PR)

DILI, STLNEWS.co – Relasiona ho deklarasaun husi Partidu Conselho Nacional de Reconstrução de Timor (CNRT), hein levantementu imunidade ba deputadu bankada CNRT nain 21 hodi presta deklarasaun iha Ministeriu Publiku, hatan ba kestaun nee Prezidente Parlamentu Nasional Aniceto Guterres hatete too oras nee seidauk iha pedidu husi Ministeriu Publiku.

Prezidente Parlamentu Nasional Aniceto Guterres hatoo kestaun nee bainhira remata hasoru malu ho Prezidente Republika Francisco Guterres Lú Olo Iha Palasiu Prezidente Bairru Pite, Segunda (22/02/2021).

PPN hatete, Parlamentu Nasional labele fo imunidade maibe so foti imunidade nee kuandu pedidu husi tribunal no Ministeriu Publiku, maibe agora seidauk iha pedidu husi MP.

“Foti imunidade nee kuandu pedidu husi tribunal ka ou husi Ministeriu Publiku se la husu ami labele halo buat ida, no too agora seidauk iha pedidu husi Ministeriu Publiku, ba prosesu investigasaun nee, husu autorizasaun, agora imunidade nee levantamentu nee kuandu iha too ona tribunal atu tuir ona julgamentu kuandu iha ona akuzasaun loos hotu ona iha tribunal pois tribunal husu levantamentu imunidade, ida nee sei iha prosesu investigasaun prepara akuzasaun ida nee Ministeriu Publiku husu autorizasaun ba deputadu sira neebe Ministeriu Publiku hakarak rona,” dehan Aniceto Guterres.

Antes nee mos Partidu Conselho Nacional de Reconstrução de Timor (CNRT) hein Parlamentu Nasional halo levantamentu imunidade ba Deputadu Bankada CNRT nain-21 hodi presta deklarasaun iha Ministeriu Publiku (MP).

Sekretariu Jeral Interinu Partidu CNRT, Jacinto Rigoberto, hatete membru Komisaun Polítika Nasional nian buka atualiza andamentu iha prosesu neebe lori sira ba Ministeriu Publiku iha loron 14 Janeiru liuba mak hanesan Virgílio Simith, Jacinto Viegas, Jacinto Rigoberto no Bendito Freitas, nunee iha loron 5, fulan-Fevereiru nee, Tomás Cabral, Francisco Ikulai no Francisco da Costa Guterres.

“Karik Ministeriu Publiku sei bolu mos Deputadu 21 hosi Bankada CNRT, nee duni, ita hotu tenke hein bainhira mak Parlamentu Nasional hasai imunidade hosi Deputadu CNRT nian atu ba aprezenta-an iha Ministeriu Publiku, hodi prosesu nee bele lao ba oin,”.

Nunee mos membru Komisaun Polítika Nasional Partidu CNRT, hein ho esperansa katak Ministeriu Publiku halo duni servisu neebe diak no lalais. Tanba membru CPN la konkorda ho Termu Identidade Rezidensia (TIR) atu prolonga indefinidamente, nunee mos iha konferensia imprensa nee asina hosi Prezidente CPN-CNRT, Kay Rala Xanana Gusmão.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here