DILI, STLNEWS.CO – Ministru Justisa (MJ) Manuel Carceres da Costa halo indeferementu dala rua ba iha Partidu Os Verdes de Timor, ho razaun tanba dokumentus la kompletu.
Tuir Diretor Jeral Diresaun Nasional Servisu & Rejistu Notariadu, Crisogno da Costa Neto katak, Partidu Os Verdes de Timor despaisu husi Ministru Justisa nian indefere ho kondisaun, tanba partidu nee seidauk kompletu dokumentus, tanba nee Ministru husu ba Prezidente Partidu Os Verdes de Timor katak, tenke kompleta dokumentus sira nee para depois lori mai atu hetan verifikasaun.
“Dokumentus husi munisipiu haat mak la kompletu no la to’o mil, ho razaun nee mak ministru indefere sira nia dokumentus sira nee,’’ dehan nia ba jornalista sira iha nia knaar fatin Bebora, Dili, Kinta nee (20/01/2022).
Diretor nee hatutan, tuir Lei Partidu Politiku nian kada munisipiu ida nia apoiante tenkeser 1 mil apoiante (1.000), kopia kartaun eleitoral no komprova ho Billete Indentidade (BI) ou identifikasaun sivil, maibe sira mai nee la to’o 1 mil.
Nunee, ministru indefere sira nia dokumentus nee iha loron 7 fulan Janeiru tinan 2022. Despaisu indeferementu Ministru Justisa nian nee dirije ba Prezidente Interino Partidu Os Verde de Timor, husu para atu kompleta sira nia dokumentus neebe sei falta, nunee sira bele mai submete fila fali.
(ter)
