Indonezia Entrega Roo Ambulansia Ba Timor Leste

DILI, STLNEWS.co Governu Indonezia liu husi nia Embaixada iha Timor Leste (TL) entrega roo ambulansia ba Governu TL, liu husi Ministeriu Saude atu fasilita servisu saude nian ba atendimentu pasiente husi Illa Atauro no Rejiaun Administrativu Espesial Oecusse-Ambeno (RAEOA), inklui povu sira neebe hela besik tasi, labele atende ho kareta Ambulansia hodi transfere mai Hospital Guido Valadares (HNGV) Dili.

Roo ambulansia nee, espesialmente entrega husi Kuasa Usaha Ad Interim KBRI Dili, Alamsyah reprezenta Governu Indonezia ba Ministra Saude, Odete Maria Freitas Belo, reprezenta Governu TL iha Portu Dili, Kinta horiseik (25/11/2021).

Diretor Nasional Ambulansia no Medikal (SNAEM), Horacio Sarmento da Costa liu husi nia diskursu hatete, Institutu Nasional Ambulansia Emerjesia Medikal (SNAEM) hato’o agradesimentu ba Governu Indonezia, liu husi nia Embaixada iha TL ka KBRI Dili ba apoiu roo ambulansia, liu husi kooperasaun entre nasaun rua  iha area saude nian.

“Liu husi kooperasaun iha area saude nian, maka ohin bele realiza serimonia entregamente roo ambulansia husi Governu Indonezia ba Governu TL, atu fasilita servisu saude nian atu transferensia pasiente husi Atauro no RAEOA mai HNGV Dili,” dehan Horacio.

Nia hatutan, roo nee nia kapasidade bele tula ema nain 25 no garante katak, roo nee iha forsa bele lao dook, tanba antes to’o iha Dili, roo ambulansia nee sai husi Surabaya (Jawa Leste) ho rute Banyuwangi-Lombok-Larantuka (Flores)-Kupang-Alor-Dili.

“Ho nunee, ita haree katak, ninia kapasidade no forsa atu bele fo atendimentu ba ita nia illa sira hanesan Atauro ho Oecusse bele responde,” katak nia.

Nia mos dehan katak, durante nee Ministeriu Saude iha deit kooperasaun ho aviaun neebe maka bele halo evakuasaun ba ema moras ka pasiente sira, maibe aviaun nee nia operasaun bele halo deit iha loron, oras tuku 07:00 dader to’o tuku 17:00 lokraik, nunee iha kalan aviaun la bele halo operasaun, tanba kondisaun aeroportu neebe seidauk iha fasilidade sufisiente, maka aviaun la bele semo iha tempu kalan, nunee otomatikamente pasien neebe presiza urjente atu transfere mai Dili iha tempu kalan la bele responde.

“Dala barak iha xamada kalan nee husu apoiu husi Polisia Unidade Maritima sira, maibe dala ruma sira mos iha problema, entaun labele responde. Ho situasaun hanesan nee, pasiente balun hakotu iis tanba kapasidade atu atende ida nee seidauk bele. Tanba nee, roo ambulansia neebe Governu Indonezia oferese ba TL nee ajuda tebes servisu saude nian ba atendimentu emerjensia,” katak nia.

Nia dehan, SNAEM hanesan instituisaun foun ida neebe maka foin hamriik iha inisiu tinan 2021, ho orgullu boot ho roo ambulansia ida nee bele ajuda no bele halo evakuasaun ba maluk sira. Ida nee mos aumenta responsabilidade boot ba SNAEM atu garante no kuidadu nafatin roo ida nee ho kondisaun neebe maka diak, atu bele fo atendimentu ba nesesidade komunidade sira nian.

Tanba nee, katak nia, teknikamente SNAEM mos sei halo nafatin kordenasaun ho parte relevante sira, atu nunee bele apoiu nafatin, liu – liu iha aspeitu tekniku sira no asegura nafatin roo ida nee ho kondisaun neebe maka diak, hodi fo atendimentu ba komunidade sira.

“Ami mos iha ona preparasaun ekipa tekniku ba operasaun roo ida nee, kompostu husi nakoda nain tolu ho ninia ABK nain neen, inklui mos profesionais saude sira hanesan, mediku, infermeiru sira nee tenke iha roo laran, servisu nee hanesan rotasaun para bainhira xamada ruma iha loron no kalan sira prontu para desloka kedas ba iha fatin neebe maka presiza,” nia akresenta.

Nunee mos, Governu Indonezia liu husi Kuasa Usaha Ad Interim KBRI Dili, Alamsyah hatete katak, iha tinan 2020 Governu Indonezia neebe lidera husi Presidente Joko Widodo (Jokowi) ajuda TL ho orsamentu rihun atus rua resin rua (US$ 202.000), liu husi Ministeriu Saude ho apoiu roo ambulansia.

Nia hatete, roo ambulansia nee atu fasilita servisu saude nian hodi fo atendimentu ba ema moras neebe presiza transfere husi Atauro no RAEOA ba Dili iha kualker tempu. Aleinde nee, roo nee bele atende povu sira neebe hela besik tasi, neebe labele atende ho kareta ambulansia ou aviaun.

Reprezentante Governu Indonezia nee mos hatete katak, Kompania Fiberboat Indonezia mak hetan oportunidade iha prosesu lelaun ba roo ambulansia nee. Kompania produs roo nee bazea ba kontratu no finalidade tuir tempu neebe determina iha kontratu.

“Roo ambulansia neebe agora dadaun fizikamente iha ita nia oin, Portu Dili mai husi Indonezia ho kilometru 2.200 ho rute husi Banyuwangi-Jawa Leste-Lombok-Larantuka-Kupang-Dili iha loron 22 fulan Novembru tinan 2021,” dehan Alamsyah bainhira hato’o diskursu iha serimonia entrega roo ambulansia husi Governu Indonezia ba Governu TL iha Portu Dili, Kinta horiseik (25/11/2021).

Nia mos hatete katak, treinamentu ba kandidatu crew neebe prepara husi Ministeriu Saude hahu ona husi loron 24 to’o 26 fulan Novembru tinan 2021.

Iha biban nee mos nia hato’o mensajen no esperasaun husi Governu Indonezia katak, roo nee uza ho didiak ba atendimentu povu TL neebe presiza iha situasaun normal no emerjensia.

Nia mos hatete katak, Kompania Fiberboat Indonezia prontu atu apoiu no ajuda bainhira presiza konsultasaun ba operasaun roo ambulansia nee, liu husi meus komunikasaun online ou virtual durante fulan neen (6) ba oin, no kontinuasaun kontratu manutensaun depois durasaun garansia hotu.

“Ami hato’o agradese ba entidades tomak nia servisu hamutuk iha setor saude entre nasaun rua neebe realiza ho diak,” dehan Alamsyah.

Iha parte seluk, nia mos hato’o agradese ba entidades hotu nia esforsu tomak iha prevensaun Covid-19 neebe ohin loron moras corona komesa tuun makaas.

Iha fatin hanesan, reprezentante husi Ministru Finansas, atual Diretor Jeral Jestaun Rekursu Esternu iha Ministeriu Finansas, Antonio Freitas haktuir katak, roo ambulansia neebe ohin Governu TL simu hanesan rezultadu no akordu neebe maka asina iha loron 17 fulan Dezembru tinan 2020, husi Ministeriu Finansas ho Embaixada Indonezia iha tempu Embaixador Indonezia ba TL, neebe sei asumi husi Embaixador Sahat Sitorus.

Nia hatete katak, roo ambulansia neebe Governu Indonezia oferese ba Governu TL hanesan simbolu amizade doador husi nasaun rua nian.

“Roo ambulansia ida nee sei transporta rapidamente parseiru sira neebe maka moras husi Atauro, nomos fatin sira neebe maka nesesita transporte maritima, liu – liu ambulansia ba tratamentu saude iha Dili,” haktuir nia.

Serimonia nee remata ho asina dokumentu entregamente roo ambulansia neebe asina husi Zarkasih Hendri Kholili, A. Md, reprezenta Kompania Fiberboat Indonezia no Horacio Sarmento da Costa nuudar Diretor Nasional Ambulansia no Medikal (SNAEM). Hafoin asina dokumentu, Ministra Saude, Odete Maria Freitas Belo akompana husi Kuasa Usaha Ad Interim KBRI Dili, Alamsyah ho lideransa lubuk koko roo nee husi Dili ba Illa Atauro.

(Lia/Mik)

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 4 Dezembru: Kazu Pozitivu 1 & Rekuperadu Nain 1

DILI, STLNEWS.co - Ohin loron, Sabadu (04/12/2021), Kordenadora Jeral Surtu Covid-19, Ministeriu Saude Timor Leste deteta tan kazu pozitivu ida (1) no rekuperadu nain...

PR Periodu 2022-2027 Presiza Tau Interese Ba Estadu & Povu TL

DILI, STLNEWS.co - Prezidente Republika (PR) ba periodu tinan 2022-2027 atu ukun husi se deit presiza mak tau interese ba estadu no povu Timor...

Lidera Enkontru G7+ Iha Lisboa, Xanana Kontinua Promove TL Ba Mundu

PORTUGAL, STLNEWS.co - Lider karismatiku Xanana Gusmão, nu'udar mos pesoa eminente g7+ kontinua promove Timor Leste ba mundu liu husi g7+, bainhira hamutuk ho...