DILI, STLNEWS.co – Jornalista neebe mak desidi sai media oficer ba membru governu ou inklina aan iha politiku, entrega fila kartaun profisional, labele halao ona knaar jornalista nia, se mandatu remata hakarak fila ba jornalista tenki estajiu tinan 2 mak hetan kartaun profisional.
Kestaun nee hatoo husi Prezidente Konselhu Imprensa, Otelio Ote ba jornalista sira iha salaun SEKOMS Palasiu Governu, Sesta (14/07/2023).
Nia hatete, lei komunikasaun sosial iha neeba hatete konaba inkompontabilidade ba jornalista no sira neebe mak la sai jornalista mak sira neebe sai funsionariu publiku, F-FDTL, Polisia, tama estrutura partidu politiku, asesor ka media oficer.
Prezidente Konselhu Imprensa hatete, bainhira sira asumi kargu ida nee, automatikamente sira nia profisaun nudar jornalista nee tenki remata no sira entrega karta profisional ba Konselhu Imprensa, para hapara sira nia atividade jornalistiku.
“Bainhira remata sira nia pozisaun ida nee, sira presiza tinan rua mak foin hetan fali karteira profisional, karik jornalista balun neebe mak agora daudaun remata ona ninia pozisaun nudar media oficer iha governu ka fatin neebe mak sira haknaar aan ba, bele fila fali ba iha meius komunikasaun sosial sira, maibe la hetan karteira profisional molok tinan rua nia laran, so iha tinan 2 nia laran mak foin hetan karteira profesional,” katak nia.
Nia afirma, jornalista mak sai hanesan militante baibain deit, ida nee laiha problema, importante mak labele tama iha estrututa partidu, sai media oficer sira, ida nee labele halao fali knaar nudar jornalizmu.
Iha fatin hanesan, Prezidente TLPU Candido Alves hatutan, regulamentu husi TLPU nia hatete, jornalista neebe mak desidi sai ona media oficer ba partidu politiku ou inklina aan iha estrutura partidu, nee laos ona membru TLPU.
“Hau hanoin TLPU nia regulamentu lo-loos katak, ema neebe ba tama ona apoiu politiku nia laos ona membru, no labele halao ona knaar nudar jornalista nian, tanba jornalista mak ema neebe tur iha dasi matan lo-loos, maibe bainhira nia inklina aan ona iha media oficer, katak nia ba ona tuir partidu ou grupu neebe manan hodi kaer ukun, tanba nee sira neebe ba ona media oficer la halo ona knaar nudar jornalista, ida nee mak tuir desizaun TLPU nia,” dehan Candido Alves.
Nia afirma, se bainhira jornalista inklina aan ona nudar media oficer mandatu hotu ona fila fali ba jornalista, ida nee ema atu fo fiar nee susar ona.
“Antes nee ba ona grupu ka partidu ida neeba, maibe fila fali mai sai fali dasi matan lo-loos nee lalos, tanba jornalista nee ema jornalista duni, nia mantein ninia pozisaun, se nia ba ona media partidu ida nia nee nia laos ona jornalista, no nia laos ona sai dasi matan neebe diak,” katak nia.
Nunee mos Sekretariu Estadu Komunikasaun Sosial (SEKOMS), Expedito Dias Ximenes hatete, media halao nia knaar nafatin respeita lei komunikasaun sosial, labele kriminaliza produtu jornalistiku, se bainhira nia halao nia knaar hanesan ema jornalista.
(eme)
