DILI, STLNEWS.co – Roo Haksolok governu gasta ona osan US$ 30 milhaun resin, maibe seidauk too Timor, mak tuir Auditoria Tribunal de Kontas katak, iha infrasaun finanseira rekomenda Ministeriu Publiku atu halo investigasaun, maibe atribui kompetensia ba KAK halo investigasaun, ikus mai komisariu nia mandatu remata, investigasaun ba prosesu seluk inklui roo Haksolok sei suspende.
Tuir Diretor Investigasaun KAK Jose Verdial katak, hahu kedas husi komisariu nia mandatu remata, servisu KAK nia paradu kedan, tanba tuir lei neebe iha, komisariu deit mak iha kompetensia tomak.
“Kuandu komisariu laiha prosesu investigasaun hotu sei suspende, inklui roo Haksolok,” dehan Jose ba STL iha Dili, Tersa (22/08/2023).
Nia hatutan, fiar katak governu foun sei tau mos prioridade ba asuntu komisariu atu bele nomeia lalais ema ida hodi sai komisariu, atu servisu KAK nian bele funsiona normal.
Nunee kuandu komisariu seidauk iha, prosesu balu neebe antes nee KAK halo hela investigasaun, KAK mos labele notifika parte balu nebee iha atu presta deklarasaun, tanba komisariu laiha.
Iha fatin ketak, Jurista Julio Crispin Belo katak, Komisariu KAK laiha sai preokupasaun ema hotu nian, no instituisaun nee atu funsiona ho diak presiza iha komisariu ida.
“Ida nee ita nia preokupasaun no sosiedade nia preokupasaun hotu konaba Komisariu KAK, tanba kleur ona instituisaun estadu ida laiha nia lider, laiha nia xefi atu orienta no organiza servisu iha instituisaun estadu ida nee,” dehan nia.
Tuir Jurista, KAK importante atu haree ba servisu estadu nian, laos deit kontrola maibe prevene krimi sira neebe liga ba korupsaun nian, nomos investiga krimi sira konaba korupsaun nian, tanba nee Prezidente KAK importante no urjente ba ita nia estadu.
(ter)
