IX Governu Nia Servisu Laiha Progresu

DILI, STLNEWS.co – Tuir sosiedade sivil nia observasaun ba iha progresu IX Governu, hahu inisiu too mai ohin loron laiha mudansa, tanba servisu barak la lao.

Kestaun nee hatoo husi Segundu Visi Diretor HAK, Antonino de Limas ba STL iha nia knaar fatin Farol, Kuarta (10/01/2024).

Nia hatete, tuir sira nia observasaun ba IX Governu nia atividade, dezde uluk too agora laiha progresu.

“Tenki onestu, IX Governu sira nia mandatu halo servisu efetivu karik fulan 6 ita la haree sira nia progresu, buat neebe mak mosu iha publiku mak problema mak mosu, hanesan ohin hau koalia tiha problema mosu iha saude, Ministeriu Justisa liga ho pasaporte neebe ita rona dehan rezolve ikus mosu problema nafatin, problema mosu barak liu nomos hapara profesores, problema stok hotu aimorok too agora seidauk rezolve,” katak nia.

Nia hatutan, tuir nia haree problema sira nee halo servisu XI Governu nia laiha progresu, tanba nee labele sukat hodi hatete progresu governu nee nia iha nee.

“Hahu Janeiru too Dezembru ita bele halo avaliasaun didiak husi ministeriu ida neebe mak hatudu progresu servisu diak,” katak nia.

Diretor AJAR Jose Luis de Oliveira afirma, IX Governu nia servisu agora bele haree katak, sira la kumpri sira nia promesa, tanba antes nee Primeiru Ministru deklara ona katak, iha 120 nia laran sei halo buat barak, maibe la realiza.

“Realidade ita haree eleisaun Xefi Suku sabraut, rezolve problema iha instituisaun polisia nia laran laos rezolve problema ho diak, maibe atu kria fali konfuzaun ba fali ministeriu defeza, sira neebe reformadu ona sira ba hatama fali agora prejudika fali ministeriu defeza, edukasaun agora enfrenta problema profesores sira neebe kontratu hotu ona, maibe atu halo rekrutamentu maibe rezolve ida nee mos kleur la halimar hodi prejudika ema halo asaun greve,” katak nia.

Nia hatutan, problema seluk mak iha saude stok aimorok laiha, no ida neebe mak halo ema hotu lamenta tebes mak iha setor ekonomia, presu sasan sae makaas.

(eme)

LEAVE A REPLY

Please enter your comment!
Please enter your name here