JICA Oferese Treinamentu Online Ba Funsionariu ANATL,E.P

Ajensia Kooperasaun Internasional Japaun / Japan International Cooperation Agency (JICA) Timor Leste, lansa treinamentu online ba funsionariu Aeroportu no Navegasaun Aérea Timor Leste, empreza publika (ANATL, E.P). [ Foto: STL/Madalena Horta)

DILI, STLNEWS.co – Ajensia Kooperasaun Internasional Japaun / Japan International Cooperation Agency (JICA) Timor Leste, lansa treinamentu online ba funsionariu Aeroportu no Navegasaun Aérea Timor Leste, empreza publika (ANATL,E.P) hamutuk ema nain 12, treinamentu nee foka liu ba dezenvolvimentu infraestrutura no manutensaun ba aeroportu.

Treinamentu nee hanesan kontinuasaun apoiu husi JICA ba estudu TL, liu husi programa kooperasaun tekniku/technical cooperation entre JICA TL no ANATL,E.P, programa kooperasaun nee ho durasaun tempu ba tinan rua, no implementa ona desde tinan 2019, orsamentu neebe aloka ba programa kooperasaun tekniku durante tinan rua nia laran hamutuk $14.000,00.

“Antes nee, treinamentu refere halao ona iha Indonezia liu husi kooperasaun ho Ministeriu Transporte Indonezia / Indonesian Ministry of Transportation, maibe tinan ida nee JICA labele haruka partisipantes sira hodi ba tuir treinamentu iha Indonezia, tanba pandemia Covid-19, tan nee realiza deit liu husi online ho Ministeriu Transporte Indonezia,” kestaun nee fo sai husi Xefe Reprezentante JICA TL, Goto Ko.

Nia mos afirma liu tan katak, objektivu husi apoiu treinamentu nee atu eleva partisipantes sira nia kapasidade no konesementu iha area manutensaun no dezenvolvimentu, tan nee funsionariu husi ANATL,E.P sei aprende buat barak iha area aeroportu nian iha TL, no tuir planu treinamentu online nee sei realiza tan iha fulan Marsu no sei foka ba area importante tolu 3, kestaun finanseiru ba aeroportu, sistema kestaun seguransa, no kestaun aeroportu.*

Reportajen: Madalena Horta
Editor: Ekipa STL

LEAVE A REPLY

Please enter your comment!
Please enter your name here