DILI,STLNEWS.co – Jornalista sira tenki kumpri kode etika iha eleisaun parlamentar tinan nee.
Kestaun nee hatoo husi reprezentante Prezidente Konselhu Imprensa, Konselheiru Exepedito Loro Dias ba jornalista sira liu husi Konfrensia Imprensa iha Salaun Konselhu Imprensa, Quintal Boot, Dili, Kuarta nee (19/04/2023).
Nia dehan, iha prosesu eleitoral neebe hahu kedas husi dekretu prezidensial hodi determina data ba eleisaun parlamentar, prosesu sira ne’e hotu akompanha iha notisia ne’ebe mak lao ona durante ne’e, Konselhu Imprensa mos halo monitorizasaun ba produtu jornalistiku sira ne’e hotu.
“Konselhu Imprensa iha kedas eleisaun prezidensial hasai ona mata dalan ida atu ita bele kaer hanesan giaun, atu nune’e ita bele halao ita nia kna’ar ho imparsial, ne’ebe hakerek ona iha kode etika jornalizmu nian,” dehan nia.
Jornalista kuandu viola infrasaun sira iha tempu kampanha eleitoral, Konselhu Imprensa sei fo sansaun hanesan notifikasaun ba media no dada fila kartaun profisional.
Nia hatete, Konselhu Imprensa iha eleisaun sira liu ba sempre ezije halo advokasia makaas konaba direitu jornalista sira nian iha sira nia servisu jornalistiku, oinsa sira bele vota hanesa sidadaun iha fatin ne’ebe sira halo kobertura, ida ne’e Koselhu Imprensa nafatin servisu makaas atu bele realiza hakarak ida ne’e.
“Ida ne’e Konselhu Imprensa senti katak, presiza nafatin Konselhu Imprensa nia intervensaun, Konselhu Imprensa sei haruka karta ofisial ida ne’e ba Orgaun Eleitoral CNE ho STAE, atu tau atensaun makaas liu ba iha servisu ne’ebe jornalista sira halo liu-liu iha prosesu eleitoral,” dehan nia.
Iha fatin hanesan, Konselheiru Francisco Simoes mos hatutan, hanesan membru Konselhu Imprensa nafatin foo hanoin ba jornalista sira atu kontinua tane kode etika jornalistika nian, bainhira halo kobertura iha eleisaun parlamentar.
“Hodi nunee ita la halis ba partidu ou lider partidu balu, imparsial nee importante,” dehan nia.
Aleinde nee, nia mos preokupa ho media sira neebe mak rejistu ona iha Konselhu Imprensa, depois halo live streaming ba iha atividade partidu politiku sira.
(mar)
