Jose Ramos Horta Selebra Tinan Moris Ba Dala-71

Eis Prezidente Republika ho Laureado Premio Nobel da Paz, Dr. Jose Manuel Ramos Horta, loron 26 Dezembro halo tinan moris ba dala-71. (Foto: STL)

DILI, STLNEWS.co – Eis Prezidente Republika Jose Ramos Horta (JRH), selebra tinan moris ba dala 71 hamutuk ho familia, iha ninia rezidensia J. F. Kennedy Boulevard, Area Branca, Dili.

Eis Prezidente Republika ho Nobel da Paz Jose Ramos Horta, iha loron 26 fulan Dezembru 2020 halo tinan 71.

Foto: STL

Atu komemora loron ksolok nee, Ramos Horta neebe uluk hanesan Primeiru Ministru ho Ministru Negosiu Estranjeiru no Kooperasaun (MNEK) konvida familia, maluk ho amigu sira hotu tuir jantar selebrasaun iha ninia rezidensia J. F. Kennedy Boulevard, Area Branca, Dili.

Ema barak husi kamada oin oin mak marka prezensa iha loron ksolok nee, hodi hatudu duni nia relasaun diak ba ema hotu hotu hanesan diplomata, politiku, bisnis, NGO, midia, labarik no ema bain bain. Iha labarik balu mai lori tais, lori buah ho malus, nunee mos labarik lubuk ida lori cake aniversariu 5.

Foto: STL

Hafoin koa hotu cake, eis aman ba nasaun nee agradese ba prezensa ho atensaun ema hotu hotu neebe partilla ho nia loron ksolok nee.

Lia fuan agredesimentu badak tebes iha lian ingles, portugues ho tetun. Ramos Horta kalan nee, tau faru kor azul ho motivu mutin-mutin, kombina ho kalsa metan, dehan ho rileks katak nia la halo tinan.

Eis Enviadu Espesial Sekretariu Jeral ONU nian ba Guinea Bissau nee, la konkorda ho kalendariu agora dadaun, tanba kalendariu nee tuan ona no mai husi Kristianismu Europa Osidental (Western European Christian), nia hodi fo ezemplu bainhira lao ba Maubisse, Suai ka Lospalos maun alin sira iha neeba la sura tinan ida.

Foto: STL

Lia fuan badak hirak nee halo ema sira nee basa liman ho hamnasa, hodi akompana dadaun ho tiru fugetes sira.

Entretantu jantar aniversariu nee, hahu iha tuku 6:30 loraik too tuku 12:00 kalan, neebe akompana ho muzika.

Reportajen: Ekipa STL
Editora: Carme Ximenes

LEAVE A REPLY

Please enter your comment!
Please enter your name here