DILI, STLNEWS.co – Joven sai maduru presiza hakaas aan estuda no partisipa iha atividade hotu, hodi bele hasae konhesimentu, tanba joven futuru nasaun nia.
Kestaun nee hatoo husi Deputada CNRT, hanesan Presidente Komisaun C, Cedelizia Faria dos Santos ba STL liu husi telefone, Kuarta nee (12/07/2023).
Nia dehan, kontinua aprende no kontinua estuda, nunee hasae abilidade hodi partisipa iha prosesu dezenvolvimentu nasional.
“Mensajen ba iha foinsae sira atu kontinua estuda, tanba sira mak futuru nasaun, ba joven foinsae sira, imi mak futuru Nasaun Timor-Leste nian, tanba nee labele baruk atu aprende, aprende bele liu husi neebe deit, aprende husi eskola, husi atividade estra korikuler sira, aprende husi komunidade sira, ita nia senior sira, agora nee diak liu tan moris ona iha tempu teknolojia, entaun fasil mos atu aprende uza meius sira nee, meus teknolojia laos atu aprende buat ladiak deit, maibe tenki uza ba sasaan pozitivu sira,” dehan deputada.
Reprezentante povu nee mos husu joven sira ajuda mos inan aman sira iha uma, no fo ulun hodi estuda, hadook aan husi krimi sira seluk.
“Joven sai maduru, saida mak presiza halo, tenki eskola, tenki estuda, partisipa iha atividade pozitivu sira, iha uma karik ajuda inan aman , partisipa mos iha atividade igreja nian, karik relijiaun katolika, sei iha konhesimentu diak konaba hakerek karik, bele komesa ho hakerek, kria amibiente ida neebe diak iha komunidade, hases aan husi krimi, tanba krimi nee ladiak ba imi nia futuru, kontribui ba harii paz no dame iha ita nia rai,” dehan nia husi mensajen.
Nunee mos Diretora Fundasaun Haburas, Moris Emerenciana Nipo haktuir, jerasaun tuan sira laos ukun too rohan laek, maibe bainhira sira katuas ona, joven ou foinsae sira mak sei kontinua sira nia ain fatin hodi lori rai nee ba oin, tanba nee joven sira nafatin prepara aan.
“Ohin loron ukun husi jerasaun tuan, ita nia aman luta nain sira, bainhira katuas ona entrega fali ba jerasaun foun sira, hanesan mos lider karismatiku Xanana Gusmao neebe mak hatoo husi nia mensajen ba joven sira katak, joven sira kontinua estuda, tanba imi mak futuru rai ida nee nia, ida nee hatudu katak sira ukun laos too rohan laek, maibe tempu sira idade labele ona, joven mak sei kaer ukun, entaun agora presiza estuda,” katak nia.
Nia hatutan dala barak joven sira hatete estuda hotu laiha kampu servisu, ida nee los no realidade akontese, maibe ida nee mos laos taka dalan atu estuda, tanba ohin ho aban tempu nebee mak la hanesan.
(eme)
