DILI, STLNEWS.co – Joven sempre sai autor ba pas, maibe partidu politiku ida-idak tenki kontrola militantes sira para labele hamosu konflitu.
Tuir Hugo Lourenço da Costa hanesan Visi Reitor III, asuntus estudantil husi Universidade Dili (UNDIL), ba STL liu husi telefone, Domingu nee (23/04/2023).
“Jovens sempre sai autor ba pas, maibe partidu politiku mak uza joven ba interese lider parpol nian nunee akontese Krimi, tanba nee husu atu parpol kontrola nia membru no militantes labele kria konflitu iha baze, liu-liu parpol sira neebe identidade mai husi arte marsiais, tanba nee ita espera katak, parpol ho karater sira nunee tenki kontrola membru hotu, nunee kampanha nee lao ho diak no susesu,” dehan nia.
Nia dehan, joven sempre kria pas no estabilidade, liu-liu iha atividades kampanha parpol ninia, neebe mak daudaun nee lao hela iha rai ida nee, tanba nee joven nafatin kria pas no militantes husi partidu politiku sira mos labele halo konflitu ba malu.
“Ita nian joven mak sempre kria pas, no husu joven labele halo konflitu iha ita nian atividades kampanha neebe mak ita nian parpol sira sei halao iha ita nian munisipiu sira, ita atu kria pas no estabilidade, nee parpol sira presiza fo hanoin nafatin ba sira nia militantes sira.
Iha fatin seluk, Joao Lopes de Carvalho nudar Xefi Suku Zulo, Postu Administrativu Zumalai, Munisipiu Covalima dehan, nudar xefi suku husu nafatin ba joven sira tenki hakarak no labele halo problema durante iha atividades kampanha nia laran.
“Hau husu nafatin ba hau nia joven sira iha Suku Zulo labele halo problema durante iha atividades kampanha nian laran,” dehan nia.
Joao husu ba joven tenki kria pas no estabilidade, ida-idak tenki hakmatek, labele halo konflitu, no husu para evita problema, tanba durante fulan ida parpol sira sei halao atividades kampanha, ema hotu tenki kria pas no estabilidade.
(jac)
