DILI, STLNEWS.co – Programa Monitorizasaun Sistema Judisial (JSMP – sigla ingles) husu deputadu sira iha VI Lejislatura atu tama servisu tuir oras neebe iha, hodi diskuti konaba lei no preokupasaun populasaun sira nian.
Diretora Ezekutiva JSMP, Ana Paula Marçal hateten, objetivu husi audensia ho Prezidente Parlamentu Nasional mak atu aprezenta deskobrimentu balun ligadu ba pontualidade servisu neebe iha.
Tuir nia, deskobrimentu neebe antes nee JSMP deteta mak deputadu sira iha lejislatura, antes nee ladun komprimenta oras servisu neebe mak iha, bainhira deskuti konaba lei no preokupasaun povu nia.
“Ami hatoo ba Prezidente Parlamentu neebe sei diriji parlamentu ida nee, ami nia rekomendasaun atu haree liu ba progresu neebe mak iha no dezafiu sira neebe presiza hadia iha lejislatura agora, liu-liu konaba kestaun pontualidade, atu ita nia deputadu sira oinsa mai partisipa iha plenaria kompri oras,” dehan Diretora Ezekutiva JSMP, Ana Paula Marçal ba jornalista sira iha PN, Kinta nee (13/07/2023).
Nia hatutan, reprezentante povu iha uma fukun presiza atu respeitu oras servisu, tanba atu diskuti buat ruma presiza prienxe korum.
(alb)
