DILI, STLNEWS.co – Judicial System Monitoring Program (JSMP) prefere Sergio Hornai ba Komisariu Komisaun Anti Korupsaun (KAK), tanba nia iha ona esperiensia atu kombate korupsaun iha Timor Leste.
Lia hirak nee Visi Diretor JSMP, Casamiro dos Santos deklara, relasiona ho desizaun governu neebe propoin Sergio Hornai no Rui Pereira ba Komisariu Komisaun Anti Korupsaun.
“Ida nee mak desizaun husi governu atu propoin Sergio Hornai kaer no lidera KAK, mak hau fiar katak nia bele halo servisu neebe mak diak, tanba nia hatene ona frakeza no problema sira neebe durante nee nia hasoru,” dehan Visi Diretor JSMP, Casamiro dos Santos ba jornalista sira hafoin remata enkontru ho Visi Primeiru Ministru Mariano Assanami Sabino iha Palasiu Governu, Sesta nee (15/09/2023)
Nia hatutan, tuir observasaun neebe sira iha, eis Komisariu KAK Sergio Hornai durante nee halo duni servisu lubuk ida maski hasoru difikuldade balun.
“Bazeia ba ami nia observasaun durante nee sira halo duni servisu lubuk ida, hau hanoin ita bot sira akompanha husi relatoriu neebe mak sira fo sai, maibe iha tempu neebe hanesan ita mos haree katak sira iha dezafiu lubuk ida neebe mak sira hasoru, entaun durante nee ladun iha buat balun neebe mak ladun lao ho efetivu,” tenik nia.
(alb)
