Juventude FRETILIN Rejeita Partisipasaun TL Iha Expo Dubai

DILI, STLNEWS.co – Juventude FRETILIN rejeita total atu Timor Leste partisipa iha Expo Dubai 2020, tanba tuir sira dadaun nee Timor Leste hasoru krize mundial hanesan pandemia Covid-19 no fo impaktu ba iha ekonomia rai laran.

Tanba nee tuir lolos governu tau prioridade liu ba realidade moris sosial no ekonomia neebe mak nasaun Timor Leste hasoru ho krize saude publika.

Tanba VIII Governu Konstitusional neebe lidera husi Primeiru Ministru (PM) Taur Matan Ruak harii komisaun ida hodi elabora planu rekoperasaun ekonomiku atu normaliza hikas ekonomia neebe monu no halo problema sosial mos hetok aat liu tan, iha planu rekoperasaun ekonomiku introdus medidas importante lubuk ida, maibe governu la konsentra hodi atinje programa governu neebe hetan aprovasaun iha Parlamentu Nasional (PN).

“Juventude FRETILIN kontinua rejeita nafatin programa Expo Dubai iha post Covid-19 no husu governu atu konsentra deit ba programa governu no planu rekoperasaun ekonomiku hodi hatan problema sosial no ekonomia neebe povu maubere hasoru hela no nunee bele ajuda rezolve hikas bainhira ita tama ba era normal,” informa porta voz juventude FRETILIN, Zeferino da Silva liu husi konferensia imprensa iha sede Comite Central Fretilin Comoro, Segunda (14/06/2021).

Tuir nia, juventude FRETILIN konsidera partisipasaun Timor Leste nian iha Expo Dubai 2020 nee hanesan ba gasta deit povu nia osan maibe povu barak mak sei kiak, mal nutrisaun aumenta, bee mos la iha no seluk tan.

“Juventude FRETILIN mos konsiente katak ita presiza duni atu halo relasaun diplomatika ho nasaun hotu iha mundu, hanesan ita nia konstitusaun republika loke dalan ba ita maibe labele lori Expo Dubai 2020 hanesan programa primadora,” dehan nia.

Tanba nee sira husu ba Prezidente Autoridade Nasional Expo Dubai 2020 atual Ministru Turismo Komersiu no Industria (MTCI-sigla Portugues), José Lucas da Silva atu esplika didiak sá benefisiu mak Timor-Leste hakarak husi Expo Dubai ba impaktu ekonomia no sosial iha tempu badak no ba tempu naruk nian ho nia progresu no rezultadu.

Antes nee Primeiru Ministru (PM) Taur Matan Ruak hateten katak Timor Leste nia preparasaun atu partisipa iha Expo Dubai 2021 nee hahú kedas iha tinan 2018 no ida nee nuudar oportunidade atu projeta Timor-Leste nia poténsia ba nasaun sira iha médiu oriente, tanba nee laiha razaun atu kansela derepente.

“Tuir hau nia hanoin, sei laiha razaun ba ita hapara, ita mantein prosesu ida nee tanba deskute kedas wainhira hau sai Primeiru Ministru, primeiru hasoru mak konsul Libanu, nia mak lori kedas ideia nee iha 2018, entaun tinan barak ona ita investe, tanba nee la fasil ita atu deside buat neebe ita lao dook ona, ita deside derepente kansela nee susar,” dehan PM Taur.

Reportajen: Alberto Menezes
Editora: Domingas Gomes

LEAVE A REPLY

Please enter your comment!
Please enter your name here

NEWS UPDATE

Covid-19 Update (26 Jullu 2021): Pozitivu 6, Rekoperadu 45, & Ativu 656

DILI, STLNEWS.co - Loron 26 fulan Jullu liu Centro Integrado Gestão de Crises, Sala Situação (CIGC-SS) rejistu kazu pozitivu Covid-19 iha nain 6, Dili...

Demisaun Membru PNTL 3, PN Rekonese Bazeia Ba Regulamentu

DILI, STLNEWS.co - Parlamentu Nasional (PN) liu husi komisaun B neebe trata asuntu defeza seguransa no negosiu estranjeiru rekonese demisaun membru Polisia Nasional Timor-Leste...

Komisaun F Seidauk Aprova Projetu Lei Protesaun Ba Labarik

DILI, STLNEWS.co - Parlamentu Nasional (PN) liu husi Komisaun F trata asuntu Saude, Seguransa Sosiais no Igualidade Jeneru, seidauk aprova projetu lei protesaun labarik...
%d bloggers like this: