BAUKAU, STLNEWS.co – Kaben nain neebe halo ona juramentu iha altar lulik hili dalan divorsiu nee tanba egoista, tanba nee husu haburas domin familia no haburas juramentu iha altar lulik.
Lia hirak nee hatoo husi Padre Paroku Santo Antonio Katedral Baukau, Pe. Manuel da Silva Ximenes, SDB ba STL iha Igreja Katedral Baukau Kuarta nee (19/07/2023)
Padre dehan, husu kaben nain sira labele egoista ho sasan mundu nia hodi la fiel ba juramentu.
“Kaben nain sira primeiru rekonhese aan katak sira Maromak nia ilas, se Maromak nia ilas no Maromak nia lalatak Maromak hili feto no mane halo sira moris hamutuk.” padre esplika.
Leitura kaben nain sira nia baibain dehan mane husik nia inan aman moris hamutuk ho nia feen, sira nain rua sai ida deit, kuandu sai ida deit hatudu katak sira Maromak nia ilas, tenki revela Maromak iha sira nia familia rasik, buat neebe Maromak tau hamutuk ema ida labele haketak, nee tenki hadomi malu too fim.
“Sira neebe la hadomi too fim nee tau deit mundu nia iha sira nia ksolok, maibe loron ida ita husik mundu, nee duni hakaas aan tau iha imi nia aan katak imi kaben nain, nee instituisaun ida neebe sagrada importante iha sosiedade nia moris,” katak padre.
Padre dehan, familia neebe simu ona sakramentu kaben, ikus hili dalan soe malu, ida nee impaktu husi egoista.
“Impaktu egoista tanba ho globalizasaun, maibe labele monu tuir ba ema nia kultura, maibe tenki firmi ho juramentu iha altar lulik,” katak nia.
Padre akresenta, dala barak problema mosu iha familia tanba deit impaktu mos husi ekonomia familia nia, maibe kuandu hanesan nee presiza hamutuk buka hodi sustenta familia, laos hili dalan ho violensia ikus divorsiu.
“Husu ba kaben nain idak-idak labele tau importansia liu ba sasan neebe loron ida sei lakon, maibe tau iha hanoin katak tenki hadomi malu nudar Maromak oan no hatudu ba mundu katak sira nee fiel duni ba sira nia vokasaun, no divorsiu nee impaktu mai husi egoizmu, kuandu mane hetan osan ona moris tun sae deit infidelidade, feto mos kuandu hetan ona osan sira tau aan mesak ona, lakohi tau hamutuk atu haburas vida familia, nee mak problema mosu ba familia, entaun divorsiu mosu iha neeba,” katak nia.
Bainhira mosu hahalok sira hanesan nee la rekonhese ona sira nia aan nudar sarani diak, maibe sira halo sira nia isin nee laos templu Maromak nia, maibe halo sira nia isin nee hanesan lisu ida neebe hodi goza, maibe tenki hatene katak isin nee templu Maromak nia.
Padre husu kaben nain sira atu labele monu tuir tentasaun mundu nia, maibe hakaas aan hadomi vokasaun nudar kaben nain.
(eme/joa)
