Kada Tinan Estadu Gasta Osan Ba Veteranus Falsu 500

Prezidente Asosiasaun Independente Rekolla Dadus Veteranus Falsifikadus, Guterres Loimali. (Foto: STL/Guilhermina Franco)

DILI, STLNEWS.co – Kada tinan estadu Timor-Leste gasta osan millaun ba millaun, ba veteranus falsu atus lima (500), maibe oras nee dadaun halao ona identifikasaun no prosesu iha ona Ministeriu Publiku (MP).

Informasaun neee hatoo husi Prezidente Asosiasaun Independente Rekolla Dadus Veteranus Falsifikadus, Guterres Loimali, katak, ohin sira koalia ho Prezidente Parlamentu Nasional (PPN) konaba ema sira neebe halo falsifika dokumentus sai veteranus, mezmu sira hatete ona katak buat sira nee labele.

“Dadus neebe identifika nee husi munisipiu 12 no mos Zona Espesial Oe-Cusse hamutuk atus lima (500) nee barak liu mak Same, sira nee simu tiha ona osan veteranus nian, neebe estadu gasta osan leet deit ba veteranus falsu sira nee. Veteranus falsu sira nee mak korupsaun boot liu, tanba osan kada tinan estadu gasta millaun ba millaun, maibe laos ba veteranus asli”, informa Loimali ba jornalista, Sesta (19/02/2021), hafoin hasoru malu ho PPN iha PN.

Nia dehan, sira nia inisiativa mai nee hetan apoiu husi instituisaun mak hanesan Prezidente Republika, Primeiru Ministru, Parlamentu Nasional, Tribunal, no mos Ministeriu Publiku, neebe rekolla ona dadus falsifika nee hamutuk atus 5, oras nee dadaun iha ona Ministeriu Publiku, no prosesu interogatoriu husu PSIK hodi ba iha tribunal.

Tuir nia, falsifika dokumentus nee tanba iha ema balu apoiu ema sira nee ba trata dokumentus, maibe buat hotu ba tribunal mak deside.*

Reportajen: Guilhermina Franco/Domingas Soares
Editor: Ekipa STL

LEAVE A REPLY

Please enter your comment!
Please enter your name here