DILI, STLNEWS.co – Kada tinan produtu naan animal hanesan karau, fahi no naan manu kuaze rihun 20 tonelada tama iha Timor Leste (TL).
Liafuan nee haktuir husi Diretor Nasional Quarentena no Bioseguransa iha Ministeriu Agrikultura no Peskas (MAP), Venancio Oliveira ba jornalista sira iha Aeroportu Internasional Nicolau Lobato, Komoro, Kinta nee (20/07/2023).
Nia informa, servisu kuarentena iha hamahon aan iha MAP, neebe bazeia dekretu lei 21/2003 nomos dekretu governu 01/2006 ninian, konaba oinsa atu kontrolu movimentu produtu agrikula neebe tama ho sai nian, liu-liu ba produtu naan manu, naan karau ho naan fahi, neebe mak mai husi nasaun oin-oin.
Entaun ho sistema kontrolu mak antes kuandu naan sira nee tama mai, fo autorizasaun importasaun mak sira hatama mai, se bainhira atu lori sai produtu agrikola husi Timor nian sai ba liur depende ba nasaun neebe simu ninia rekezitus.
Nia dehan, entaun nia kuantidade nee la fo kouta ba ema, maibe fo autorizasaun deit sira bele hatama mai, tanba konsumidor iha Timor nee maioria, sei kontinua konsumu produtu animal ninian, liu-liu naan fahi, karau nomos naan manu.
“Tuir dadus statiska kuarentena nian kada tinan maizumenus 20 mil tonelada, husi rihun 20 tonelada nee maioria naan manu barak, ba naan fahi ho karau nee ninia volume ladun boot, naan nee mai husi nasaun Amerika, Australia no Brazil, balun mai transit iha Singapura mak manda fali mai Timor,” dehan nia ba jornalista sira iha Aeroportu Internasional Nicolau Lobato, Kinta nee (20/07/2023).
Nia haktuir, naan rihun 20 tonelada nee kada tinan, ida nee mak minimu liu, nee servisu boot ida ba MAP.
Liu-liu oinsa ita hasae ita nia produsaun rai laran ninian, maibe ida nee dependente ba ita nia Timor oan sira, oinsa para atu hakiak animal sira ho diak, tuir regras no dalan neebe mak tekniku ninian, entaun ita hotu hein katak, iha futuru mai ita bele redus produtu ida nee, maibe ita nia nesesidade rai laran mos presiza naan barak, maibe governu labele halo buat barak, maibe governu hanesan fonte deit hodi fasilita, maibe halao nee kompanhia nasional ka ema pesoal sira neebe mak hakarak atu liu husi agrikultura hodi hasae produsaun animal nia,” tenik nia.
Produtu hirak nee balun husi nasaun Indonezia mak naan manu ho manutolun, maibe naan fahi ho karau ita labele simu, tanba nasaun afetadu ba moras fahi ho karau nian, ami too ohin loron seidauk simu produtu husi Xina nian. Produtu ikan nee mai husi Portugal, Malazia, Thailandia, Indonezia ho Australia.
“Hau laiha dadus fiksu benefisiariu Timor nian, maibe tuir hau nia haree deit katak, ema maioria 70-80% produtu naan tama barak liu, signifika ita Timor nee barak mak presiza han naan. Entaun signifika katak, ita iha produsaun rai laran sei menus, tanba nee mak sira hatama barak liu husi rai liur nian,” katak nia.
Konaba benefisiu ema hotu haree katak, ezemplu manu lokal ho manu konzeladu neebe hatama mai, depois tama ba iha merkadu nee manu lokal nia folin la hanesan ho manu konzeladu neebe mak tama mai.
“Entaun ita nia komprensaun nee barak liu la haree ba iha kualidade iha ka lae. Entaun ita hotu no governu ninia posibilidade para hatoo informasaun ba komunidade sira, para bele iha mudansa konsumu husi konzeladu nee ba fali produtu fresku nian, maibe depende mos ba posibilidade atu hola nee, tanba nia folin difrensia boot, manu lokal ho manu konzeladu la hanesan,” nia haktuir.
Nia akresenta, parte kuarentena la kontrolu ba nia kualidade, maibe kontrolu ba kualidade nee AIFAESA no Ministeriu Saude mak kontrola, maibe parte agrikultor nia haree mak oinsa saude diak, bainhira atu lori mai, tanba ita hatene katak, produtu naan nee iha moras neebe mak risku aas, signifika moras nee bele halo jonosis, jonosis nee moras animal bele daet ba ema, i husi ema ba animal, ka entre animal ho animal, tanba nee mak kuandu atu hatama produtu animal ruma husi nasaun rai liur mai, haree lai.
(nat)
