DILI, STLNEWS.co – Koordenador Movimentu Progresista Timor Leste, Rogerio da Cruz hatete, Komisaun Anti Korupsaun (KAK) ho Provedoria dos Direitos Humanos e Justiça (PDHJ) presiza halo investigasaun ida aprofunda, para bele buka hatene lo-loos osan neebe aloka ba iha programa sesta bazika no subsidiu US$ 200 ba kada uma kain.
“Haree ba iha osan neebe VIII Governu Konstitusional investe ba iha programa sesta bazika no subsidiu US$ 200 ba kada uma kain, nee investimentu ka gastu ida neebe boot, tanba nee presiza duni KAK ho PDHJ halo investigasaun ida aprofunda para bele buka hatene lo-loos osan neebe sira preve ba iha programa sesta bazika nee,” dehan Rogerio da Cruz ba STL iha nia hela fatin Tasi Tolu, Masin Lidun, Dili, Domingu nee (12/3/2023).
Tuir nia haree, durante periodu implementasaun sesta bazika akontese infrasaun iha fatin-fatin hodi halo komunidade sira hatoo sira nia lamentasaun ba autoridade lokal.
“Ita haree ba iha periodu implementasaun sesta bazika kuaze infrasaun mosu iha fatin-fatin, signifika satisfasaun nee mai husi ita nia komunidade, sira hatoo lamentasaun neebe boot tebes-tebes, tanba sasan sesta bazika neebe sira simu laiha kualidade,” dehan nia.
Ema hotu-hotu nia deseja mak tenki iha relatoriu neebe iha nia rasionalidade i depois tenki iha balansu ba iha transparansia ho akuntabilidade bazeia ba boa governasaun ninian, neebe mak sira hotu-hotu dehan katak governu ida ideal, maibe iha sorin seluk governu ida nee lori mos obstaklu ka dezafiu boot ida iha setor ekonomia, ita nia roda ekonomia lao la estavel, kondisaun no situasaun politika frajil.
Tuir nia, se haree husi aspeitu politiku automatikamente afirmasaun sira hanesan nee hakarak atu fo serteza ka pareser deit, katak governu ninia papel ba iha desizaun publika sira nee fo dezvantajen ka impaktu ba ninia povu rasik.
“Tanba haree ba iha kualidade sasan sesta bazika neebe mak fahe ba komunidade sira, tuir komunidade sira nia haree nesesidade baziku neebe sira simu nee laiha kualidade, i kuantidade husi sasan neebe sira distribui la tuir kuantidade osan neebe governu desidi ona,” hakotu nia.
(cri)
