DILI, STLNEWS.co – Relasiona ho informasaun balu neebe hatoo katak, atendimentu iha Sentru Saude balu lao la dun diak, ekipa perevensaun Komisaun Anti Korupsaun (KAK) sei halo inspesaun ba iha Sentru Saude balu atu bele hatene lo-loos sira nia servisu durante nee.
Tuir Diretor Jeral Prevensaun Sensibilizasaun KAK, Rosario Saldanha Araujo katak, husi parte prevensaun KAK nian forma ona ekipa ida, hodi halo inspesaun ba iha sentru saude balu.
“Agora ami konsentra hela atu tun ba iha Klinika no SAMES atu haree konaba aimoruk, atendimentu, servisu distribuisaun sira, ami sei haree hotu,” dehan nia ba STL iha Kaikoli, Segunda (14/08/2023).
Nia hatutan, problema saude sai hanesan problema nasional, aimoruk mos menus iha Sames, tanba nee iha inspesaun nee atu indentifika aimoruk hira mak aloka ba iha Klinika nee, aimoruk hirak mak sai ona, jestaun iha klinika, ajendamentu halo atendimentu ba iha pasiente sira, inklui mos sira nia programa.
Nia akresenta, inspesaun nee sei hahu iha loron Tersa (15/08/2023) ba uluk iha Klinika Bekora, Hera, Komoro nomos Tasi Tolu.
“Iha duni informasaun balu konaba atendimentu ladun diak, aimoruk menus nomos aimoruk hira mak liu ona prazu, atu sura lo-loos prejuizu hira mak estadu enfrenta hela,” dehan nia.
Tuir Diretor, inspesaun nee planeia sei halao durante semana rua no kada ekipa neebe sei halao inspesaun iha ekipa ida kompostu husi ema nain haat ka lima.
Nunee, iha loron Tersa nee sei hahu uluk iha sentru Saude Bekora no Hera. Husi inspesaun nee mak indentifika iregularidade ruma, husi parte inspesaun sei submete ba iha investigador sira hodi halo inspesaun.
Iha fatin ketak, komunidade Suku Komoro, Elizia de Jesus dehan, durante nee servisu saude sira nian sei hamosu duvidas iha ema nia leet.
“Durante nee ema barak preokupa ho atendimentu iha klinika sira, dala ruma ita ba iha situasaun emerejensia maibe la atende tuir saida mak ita hakarak,” dehan nia.
Komunidade nee husu atu ba oin presiza hadia atendimentu iha sentru saude sira, atu nunee komunidade sira hetan moras, sira mos badinas ba iha klinika hodi halo tratamentu.
Tanba tuir nia, kuandu atendimentu balu ladun diak, halo komunidade sira baruk atu ba halo tratamentu, kuandu hetan moras. Husu atu ba oin atende pasiente sira ho diak.
(ter)
