Kampu Tuti Bebonuk Nakfilak Sai Lagua

Udan boot neebe akontese Sabadu kalan too ohin loron Domingu (04/03/2021), halo bee nalihun iha area Bebonuk, Aldeia 20 de Setembru no Aldeia Kampu Tuti, too afeta ba komunidade sira nia uma iha area refere. (Foto: STL/Claudios de Jesus)

DILI, STLNEWS.co – Udan boot neebe akontese Sabadu kalan too ohin loron Domingu (04/03/2021), halo bee nalihun iha area Bebonuk, Aldeia 20 de Setembru no Aldeia Kampu Tuti, too afeta ba komunidade sira nia uma iha area refere.

Observasaun STL iha terrenu, komunidade area Bebonuk Bairru foun, kampun Tuti bee tama too uma laran no estraga sasan uma laran.

Iha Domingu madrugada nee, komunidade kampu Tuti servisu makas hasai bee iha ida-idak nia uma laran, kauza husi problema nee tanba la iha bee dalan, atu bee bele sai husi bairru laran.

Liu husi intrevista, pessoal Moizes Freitas ba STL relata katak, Bairru Kampun Tuti sai mos fatin risku ba inundasaun, tamba la iha bee dalan, ho nunee halo bee nalihun deit iha bairru laran.

“Ami iha nee tinan ba tinan sai vitima ba inundasaun, problema tamba bee dalan ou kanu atu lori bee sai liu ba tasi mak la iha, no mos ema hotu mai ho nia karakter de egoismu hodi halo satan bee (penahan), iha ida-idak nia uma oin,” dehan nia.

Area kampu Tuti defisil rezolve inundasaun, tamba nee husu parte governu ka parte relevante atu bele halo observasaun no mos estudu ida, hodi bele solusiona problema nee.

“Nee mos sai hanesan responsabilidade Autoridade Lokal iha area Bebonuk nian, liu husi meius saida deit, atu bele obriga Ministeriu Obras Publika hodi solusiona problema iha Kampu Tuti nee rasik, tamba ita nia maluk sira iha bairru kotuk nee satan netik moru boot mai ami, tamba nee bee labele sai, hodi halo tia Kampu Tuti nee sai hanesan lagua ida iha bairru laran,” dehan tan nia.*

Reportajen: Claudios de Jesus
Editora: Josefa Parada

LEAVE A REPLY

Please enter your comment!
Please enter your name here